റോം: സീരീ എ യില്‍ ഇറ്റാലിയന്‍ വമ്പന്‍മാരായ യുവന്റസിന് ജയം. കഴിഞ്ഞ ദിവസം നടന്ന മത്സരത്തില്‍ ഫ്രോസിനോനെയെ എതിരില്ലാത്ത രണ്ട് ഗോളുകള്‍ക്കാണ് യുവന്റസ് തോല്‍പ്പിച്ചത്. പോര്‍ച്ചുഗീസ് താരം ക്രിസ്റ്റ്യാനോ റൊണാള്‍ഡോക്ക് നാലു തവണ മികച്ച ഗോളവസരങ്ങള്‍ ലഭിച്ചെങ്കിലും ഒരു തവണ മാത്രമാണ് പന്ത് ലക്ഷ്യത്തിലെത്തിക്കാനായത്.
കളിയുടെ അവസാന പത്തുമിനുട്ടിലായിരുന്നു യുവന്റസിന്റെ രണ്ട് ഗോളും പിറന്നത്. 81-ാം മിനുട്ടില്‍ ക്രിസ്റ്റ്യാനോയായിരുന്നു ആദ്യമായി ലക്ഷ്യം കണ്ടത്. കളിയവസാനിക്കാന്‍ നിമിഷങ്ങള്‍ മാത്രം ശേഷിക്കെ ഫെഡറിക്കോ ബെര്‍ണാണ്ടേച്ചിയും ഗോള്‍ നേടി. ഇതോടെ അഞ്ചു കളികളില്‍ നിന്നായി റൊണാള്‍ഡോ യുവന്റസിന് വേണ്ടി മൂന്ന് ഗോളുകള്‍ നേടി.

ബാഴ്‌സലോണക്ക് സമനില
കാമ്പ് നൗ: ലാ ലിഗയില്‍ ബാഴ്‌സലോണക്ക് സമനില. 2-2 എന്ന സ്‌കോറിനാണ് ജിറോണ ബാഴ്‌സയെ സനിലയില്‍ പിടിച്ചത്. കളി തുടങ്ങി 19-ാം മിനുട്ടില്‍ സൂപ്പര്‍ താരം ലയണല്‍ മെസ്സിയാണ് ആദ്യം സ്‌കോര്‍ ചെയ്തത്. രണ്ടാം പകുതിക്ക് ശേഷം 63-ാം മിനുട്ടില്‍ ജെറാദ് പിക്വെയുടെ വകയായിരുന്നു രണ്ടാം ഗോള്‍. ബാഴ്‌സലോണ താരം ക്ലെമെന്റ് ലെങ്‌ലെറ്റിന് ചുവപ്പ് കാര്‍ഡ് ലഭിച്ചതോടെ ബാഴ്‌സ പത്തുപേരായി ചുരുങ്ങി. ഈ അവസരം മുതലെടുത്താണ് ജിറോണ രണ്ട് ഗോളും തിരിച്ചടിച്ചത്. ക്രിസ്റ്റ്യന്‍ സ്റ്റുവാനി (45,51) ആണ് ജിറോണക്ക് വേണ്ടി രണ്ട് ഗോളും സ്വന്തമാക്കിയത്.

ആഴ്‌സനലിന് ജയം
ലണ്ടന്‍: ഇംഗ്ലിഷ് പ്രീമിയര്‍ ലീഗില്‍ ആഴ്‌സനല്‍ 2-0 എന്ന സ്‌കോറിന് എവര്‍ട്ടനെ പരാജയപ്പെടുത്തി. അലക്‌സാണ്ടര്‍ ലകാസട്ടെ (56), ഒബമയോങ്ങ് (59) എന്നിവരാണ് ആഴ്‌സനലിന് വേണ്ടി ഗോളുകള്‍ സ്വന്തമാക്കിയത്. കളിച്ച ആറു മത്സരങ്ങളില്‍ നാലെണ്ണത്തില്‍ ജയിച്ച ആഴ്‌സനല്‍ 12 പോയിന്റുമായി ആറാം സ്ഥാനത്താണുള്ളത്. 18 പോയിന്റുമായി ലിവര്‍പൂള്‍ ഒന്നാം സ്ഥാനത്ത് തുടരുന്നു.