തിരുവനന്തപുരം: അറബിക്കടലില്‍ കഴിഞ്ഞ ദിവസം രൂപപ്പെട്ട 'ഗതി' ചുഴലിക്കാറ്റ് ഇന്നലെ രാവിലെയോടെ സോമാലിയ തീരത്ത് ദുര്‍ബലമായെന്ന് കേന്ദ്ര കാലാവസ്ഥ വകുപ്പ് അറിയിച്ചു.
അതേസമയം ബംഗാള്‍ ഉള്‍ക്കടലിന്റെ തെക്കുപടിഞ്ഞാറ് ഭാഗത്തായി രൂപപ്പെട്ട ന്യൂനമര്‍ദം ശക്തി പ്രാപിച്ച് ഇന്ന് 'നിവര്‍' ചുഴലിക്കാറ്റായി മാറും. വടക്കുപടിഞ്ഞാറ് ദിശയില്‍ സഞ്ചരിക്കുന്ന 'നിവര്‍' അതിതീവ്ര ന്യൂനമര്‍ദമായി നാളെ ഉച്ചയ്ക്കു ശേഷം തമിഴ്‌നാട്, പുതുച്ചേരി തീരം കടക്കുമെന്നാണ് പ്രവചനം.
'നിവര്‍' കേരളത്തെകാര്യമായി ബാധിക്കില്ല. കേരളത്തില്‍ ഒറ്റപ്പെട്ട മഴക്കു മാത്രമേ സാധ്യതയുള്ളൂ. നാളെ ആലപ്പുഴ, എറണാകുളം, ഇടുക്കി ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. അതേസമയം തമിഴ്‌നാട്ടില്‍ ഇന്നും നാളെയും പരക്കേ മഴ ലഭിക്കുമെന്നാണ് പ്രവചനം.
തമിഴ്‌നാട്ടില്‍ ഇന്ന് അഞ്ചു ജില്ലകളിലും നാളെ എട്ടു ജില്ലകളിലും റെഡ് അലര്‍ട്ട് പ്രഖ്യാപിച്ചിട്ടുണ്ട്. ഇന്നും നാളെയും കടലില്‍ പോകരുതെന്നും മുന്നറിയിപ്പുണ്ട്. എന്നാല്‍ കേരള, കര്‍ണാടക, ലക്ഷദ്വീപ് തീരങ്ങളില്‍ മത്സ്യബന്ധനത്തിന് തടസമില്ല.