കിഷ്ത്വാര്‍: ജമ്മുകശ്മിരിലെ കിഷ്ത്വാര്‍ ജില്ലയില്‍ യാത്രക്കാരുമായി പോകുകയായിരുന്ന മിനി ബസ് കൊക്കയിലേക്ക് മറിഞ്ഞ് 35 യാത്രക്കാര്‍ മരിച്ചു. 17 പേര്‍ക്ക് ഗുരുതരമായി പരുക്കേറ്റു. ഇവരില്‍ പലരുടെയും നില ഗുരുതരമാണ്.

ഇന്നലെ രാവിലെ 7.30ഓടെയായിരുന്നു അപകടം. കെഷ്‌വാനില്‍ നിന്ന് കിഷ്ത്വാറിലേക്ക് പോകുകയായിരുന്നു ബസ്. സിര്‍ഗ്‌വാരിയിലെത്തിയപ്പോഴാണ് നിയന്ത്രണം വിട്ട് ബസ് കൊക്കയിലേക്ക് മറിഞ്ഞതെന്ന് പൊലിസ് അറിയിച്ചു. മൃതദേഹങ്ങളും പരുക്കേറ്റവരെയും ഹെലികോപ്റ്റര്‍ മാര്‍ഗമാണ് ജമ്മുവിലെത്തിച്ചതെന്ന് കിഷ്ത്വാര്‍ ഡെപ്യൂട്ടി കമ്മിഷണര്‍ അംഗ്രേസ് സിങ് റാണ പറഞ്ഞു.

28 സീറ്റുകളുള്ള ബസില്‍ 52 യാത്രക്കാരാണ് കയറിയത്. അമിതമായി യാത്രക്കാരെ വഹിച്ച് അശ്രദ്ധമായി വാഹനം ഓടിച്ചതാണ് അപകടത്തിന് കാരണമെന്ന് പ്രദേശവാസികള്‍ ആരോപിച്ചു. അപകടത്തില്‍ മരിച്ചവരുടെ കുടുംബാംഗങ്ങളെ ഗവര്‍ണര്‍ സത്യപാല്‍ മാലിക്ക് അനുശോചനം അറിയിച്ചു. ഇവരുടെ കുടുംബങ്ങള്‍ക്ക് അഞ്ച് ലക്ഷം രൂപ വീതം ധനസഹായം പ്രഖ്യാപിച്ചിട്ടുണ്ട്. പരുക്കേറ്റവര്‍ക്ക് ഏറ്റവും നല്ല ചികിത്സ നല്‍കണമെന്നും ഗവര്‍ണര്‍ ആശുപത്രി അധികൃതര്‍ക്ക് നിര്‍ദേശം നല്‍കി.

ഇത്തരം അപകടങ്ങള്‍ അശ്രദ്ധയില്‍ നിന്നുണ്ടാകുന്നതാണെന്ന് പറഞ്ഞ ഗവര്‍ണര്‍, അപകടത്തിന് ഉത്തരവാദികളായവര്‍ക്കെതിരേ ശക്തമായ നടപടി സ്വീകരിക്കുമെന്നും അറിയിച്ചു. ഗതാഗതത്തിന് യോജിക്കാത്ത വാഹനങ്ങള്‍ നിരത്തിലിറക്കുന്നുണ്ടോ എന്ന് പരിശോധിക്കാന്‍ ഗതാഗത വകുപ്പിന് ഗവര്‍ണര്‍ ശക്തമായ നിര്‍ദേശം നല്‍കിയിട്ടുണ്ട്.

അപകടത്തില്‍ പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, കശ്മിര്‍ മുന്‍മുഖ്യമന്ത്രിമാരായ മെഹബൂബ മുഫ്തി, ഒമര്‍ അബ്ദുല്ല എന്നിവര്‍ അനുശോചിച്ചു.