കാഞ്ഞങ്ങാട്: എട്ടുവര്‍ഷം മുമ്പ് ഭര്‍ത്താവിന്റെ അമ്മാവന്‍ ലോക്കറില്‍ സൂക്ഷിക്കാനായി കൊണ്ടുപോയ 53 പവന്‍ സ്വര്‍ണാഭരണങ്ങള്‍ തിരിച്ചു തന്നില്ലെന്നാരോപിച്ച് അമ്മാവന്റെ വീട്ടുവരാന്തയില്‍ വീട്ടമ്മയും കുടുംബവും ആരംഭിച്ച സത്യഗ്രഹം മൂന്നുദിവസം പിന്നിട്ടു.
കുശാല്‍നഗറിലെ അസൈനാറും ഭാര്യ സമീറയും കുട്ടികളും ചേര്‍ന്ന് അസൈനാറിന്റെ അമ്മാവന്‍ മുഹമ്മദ്കുഞ്ഞിയുടെ വീട്ടുവരാന്തയിലാണ് സത്യഗ്രഹമിരിക്കുന്നത്.
പല മഹിളാസംഘടനകളും ഇവിടെയെത്തികാര്യങ്ങള്‍ അന്വേഷിച്ചറിഞ്ഞ് സത്യാഗ്രഹത്തിനു പിന്തുണ അറിയിച്ചു തുടങ്ങിയിട്ടുണ്ട്. കഴിഞ്ഞ ദിവസം പ്രാദേശിക മുസ്‌ലിം ജമാഅത്ത് കമ്മിറ്റി ഇരുവിഭാഗത്തെയും വിളിച്ചുവരുത്തി ചര്‍ച്ച നടത്തിയെങ്കിലും തീരുമാനമായില്ല.
താന്‍ 36 പവന്‍ സ്വര്‍ണം മാത്രമേ കൊടുക്കാനുള്ളുവെന്നാണ് മുഹമ്മദ് കുഞ്ഞിയുടെ നിലപാട്. മുമ്പ് പൊലിസ് ഇടപെട്ടപ്പോഴും ഇങ്ങനെ മാസങ്ങളുടെ അവധികള്‍ പറഞ്ഞാണ് മുഹമ്മദ് കുഞ്ഞി ഒഴിഞ്ഞുമാറിയതെന്നും അതിനാല്‍ ഇനി അവധി അംഗീകരിക്കാന്‍ ആവില്ലെന്നും അസൈനാറും കുടുംബവും പറയുന്നു. ഒന്നരവര്‍ഷത്തെ സമയമാണ് മുഹമ്മദ് കുഞ്ഞി ഇപ്പോള്‍ ആവശ്യപ്പെടുന്നത്.
എട്ടുവര്‍ഷം മുമ്പ് അസൈനാര്‍ ഗള്‍ഫിലായിരുന്ന സമയത്ത് അസൈനാറിന്റെ ഭാര്യയെ സമീപിച്ച് സ്വര്‍ണം തന്റെ ലോക്കറില്‍ സൂക്ഷിക്കാമെന്നു പറഞ്ഞ് മുഹമ്മദ്കുഞ്ഞി 53 പവന്‍ സ്വര്‍ണാഭാരണങ്ങള്‍ വാങ്ങിക്കൊണ്ടുപോവുകയായിരുന്നുവെന്നാണ് ഇവര്‍ ആരോപിക്കുന്നത്. എന്നാല്‍ പിന്നീട് ഈ സ്വര്‍ണം ഇയാള്‍ വിറ്റുവെന്നും ഇവര്‍ പറയുന്നു .