വടകര: ആര്‍.എം.പി.ഐ-യു.ഡി.എഫ് തെരഞ്ഞെടുപ്പ് ധാരണ തെറ്റിച്ചു ബ്ലോക്ക് പഞ്ചായത്ത് കല്ലാമല ഡിവിഷനില്‍ കോണ്‍ഗ്രസ് വിമത സ്ഥാനാര്‍ഥിക്ക് കൈപ്പത്തി ചിഹ്നം അനുവദിച്ചതിനെതിരേ കെ. മുരളീധരന്‍ എം.പി രംഗത്ത്.
ആര്‍.എം.പി.ഐ മത്സരിക്കുന്ന ഡിവിഷനില്‍ പത്രിക നല്‍കിയ കോണ്‍ഗ്രസ് നേതാവ് വിമത സ്ഥാനാര്‍ഥിയാണെന്നായിരുന്നു അറിഞ്ഞതെന്നും ഇദ്ദേഹത്തിന് ഡി.സി.സി കൈപ്പത്തി ചിഹ്നം അനുവദിക്കുകയായിരുന്നുവെന്നും ഇക്കാര്യത്തില്‍ തന്നോട് അഭിപ്രായം ചോദിച്ചില്ലെന്നും മുരളീധരന്‍ പറഞ്ഞു.
ഒരു മുന്നണിയുടെ രണ്ട് സ്ഥാനാര്‍ഥികള്‍ ഉണ്ടാകുമ്പോള്‍ ആര്‍ക്കുവേണ്ടിയാണ് വോട്ടുചോദിക്കുക.
അതുകൊണ്ട് പ്രശ്‌നങ്ങള്‍ ഒതുങ്ങിയതിനു ശേഷമേ വടകര മേഖലയില്‍ പ്രചാരണത്തിനിറങ്ങൂവെന്നും അദ്ദേഹം വ്യക്തമാക്കി. ധാരണപ്രകാരം കല്ലാമല ഡിവിഷനിലെ ഔദ്യോഗിക സ്ഥാനാര്‍ഥി ആര്‍.എം.പി.ഐയുടെ സുഗതന്‍ മാസ്റ്ററാണ്. എന്നാല്‍ മുന്നണി ധാരണക്ക് വിരുദ്ധമായി പത്രിക സമര്‍പിച്ച കോണ്‍ഗ്രസ് സ്ഥാനാര്‍ഥി കെ.പി ജയകുമാറിന് പാര്‍ട്ടി കൈപ്പത്തി ചിഹ്നം അനുവദിച്ചിരുന്നു. ഇതാണ് കെ. മുരളീധരനെ ചൊടിപ്പിച്ചത്.