റിയാദ്: നിയമംലഘിച്ച് യാത്രക്കാരെ കയറ്റി കൊണ്ടുപോയതിന് ഒരു മാസത്തിനിടെ 826 ടാക്‌സി ഡ്രൈവര്‍മാരെയാണ് സഊദിയിലെ വിമാനത്താവളങ്ങളില്‍ നിന്ന് പൊതു ഗതാഗത അതോറിറ്റി പിടികൂടിയത്. ബന്ധപ്പെട്ട വകുപ്പുകളുടെ സഹകരണത്തോടെ, രാജ്യത്തെ എല്ലാ വിമാനത്താവളങ്ങളിലും നിരീക്ഷണം തുടരുകയാണ്. ലൈസന്‍സില്ലാത്ത വാഹനങ്ങളില്‍ ആളുകളെ കയറ്റുന്നത് കുറക്കുന്നതിനും യാത്രക്കാര്‍ക്ക് നല്‍കുന്ന സേവനങ്ങളുടെ ഗുണനിലവാരം ഉയര്‍ത്തുന്നതിനും വേണ്ടിയാണിതെന്നും അതോറിറ്റി വൃത്തങ്ങള്‍ പറഞ്ഞു. വിമാനത്താവളങ്ങളില്‍ നിയമാനുസൃത ടാക്‌സി സര്‍വിസ് ലഭ്യമാണ്.

രാജ്യത്തെ എല്ലാ വിമാനത്താവളങ്ങളിലും മുഴുവന്‍ സമയവും സേവനങ്ങള്‍ ലഭിക്കുന്നതിനായി ഇത്തരത്തില്‍ ലൈസന്‍സ് നേടിയ കമ്പനികളില്‍നിന്നാണ് ടാക്‌സികള്‍ ബുക്ക് ചെയ്യേണ്ടത്. ഇതിനായി വിമാനത്താവളങ്ങളില്‍ 3600ലധികം ടാക്‌സികളും 54 കാര്‍ റെന്റല്‍ ഓഫീസുകളുമുണ്ട്. കാര്യക്ഷമത, ഗുണനിലവാരം, തുടങ്ങിയ മാനദണ്ഡങ്ങള്‍ക്ക് അനുസൃതമായാണ് ഇവ പ്രവര്‍ത്തിക്കുന്നത്.

വിമാനത്താവളങ്ങളില്‍ ചില വ്യക്തികള്‍ ലൈസന്‍സില്ലാതെ ടാക്‌സി സേവനം നടത്തി വരുന്നു, ഇത് വ്യവസ്ഥകളുടെ വ്യക്തമായ ലംഘനമാണ്. ലൈസന്‍സില്ലാത്ത വാഹന ഉടമകളില്‍ നിന്ന് 5,000 റിയാല്‍ പിഴയീടാക്കും. കൂടാതെ വാഹനം കണ്ടുകെട്ടുന്നതിനും പിടിച്ചെടുക്കല്‍ നടപടികളുടെ ഫലമായുണ്ടാകുന്ന ചെലവുകള്‍ വഹിക്കുന്നതിനും പുറമേയാണിത്. ടാക്‌സി മേഖല വ്യവസ്ഥാപിതമാക്കുന്നതിനുള്ള ചട്ടങ്ങളുടെ അടിസ്ഥാനത്തിലാണ് നടപടികളെന്നും അതോറിറ്റി വ്യക്തമാക്കി.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

 In a bid to regulate the taxi industry, Saudi authorities have apprehended 826 taxi drivers for violating laws and operating illegal services, ensuring passenger safety and adherence to standards.