ആലുവ: ആലുവ നഗരസഭ 19ാം വാര്‍ഡ് തൃക്കുന്നത്ത് പോരാട്ടം അളിയന്‍മാര്‍ തമ്മില്‍. എം.പി സൈമണ്‍ കോണ്‍ഗ്രസ് സ്ഥാനാര്‍ഥിയായി കളത്തിലിറങ്ങിയപ്പോള്‍ സഹോദരി ലീലാമ്മയുടെ ഭര്‍ത്താവ് കെ.പത്രോസ് എല്‍.ഡി.എഫിന് വേണ്ടി മത്സരിക്കുന്നു. സൈമണിന്റെ സഹോദരന്‍ ജോയിയുടെ ഭാര്യ ലിജി ജോയ് ആണ് സിറ്റിങ് കൗണ്‍സിലര്‍. 2010ല്‍ സൈമണ്‍ ആയിരുന്നു വാര്‍ഡിലെ കൗണ്‍സിലര്‍.
ഇത്തവണ ആരു ജയിച്ചാലും തുടര്‍ച്ചയായി 15 കൊല്ലവും ബന്ധുക്കള്‍ വാര്‍ഡ് ഭരിക്കും. സി.എം.ആര്‍.എല്ലിലെ റിട്ട.ജീവനക്കാരനും ഡി.സി.സി അംഗവുമാണ് സൈമണ്‍. മൂന്ന് തവണ കൗണ്‍സിലറായിട്ടുണ്ട്. ജലസേചന വകുപ്പില്‍ നിന്നു വിരമിച്ച പത്രോസിന്റെ കന്നിയങ്കമാണിത്. ഇറിഗേഷന്‍ ആന്റ് പ്രൊജക്ട് ഡിപാര്‍ട്ട്‌മെന്റ് റിട്ട.എംപ്ലോയീസ് യൂനിയന്‍ സംസ്ഥാന ജനറല്‍ സെക്രട്ടറിയാണ്.