കോതമംഗലം: റബര്‍ തോട്ടത്തില്‍ വീട്ടമ്മയെ കഴുത്തറുത്ത് കൊലപ്പെടുത്തിയ നിലയില്‍ കണ്ടെത്തി. സംഭവത്തില്‍ അയല്‍വാസിയായ റബര്‍ ടാപ്പിങ് തൊഴിലാളി വടാട്ടുപാറ കരുവള്ളി കുഞ്ഞുമുഹമ്മദിനെ (63) പൊലിസ് അറസ്റ്റ് ചെയ്തു. വടാട്ടുപറ പണ്ഡാര സിറ്റിക്കു സമീപം താമസിക്കുന്ന കുഞ്ചറക്കാട്ട് മാത്യുവിന്റെ ഭാര്യ മേരി (60) ആണ് കഴുത്തില്‍ മുറിവേറ്റ് കൊല്ലപ്പെട്ട രീതിയില്‍ കാണപ്പെട്ടത്.

മേരിയുടെ വീടിന്റെ പിറകുവശത്ത് റബര്‍ തോട്ടത്തില്‍ ഇന്നലെ രാവിലെ 11ഓടെയാണ് മൃതദേഹം കണ്ടത്. കഴുത്തിലൂടെ ചോര വാര്‍ന്ന നിലയിലായിരുന്നു. രാവിലെ പത്തോടെ റബര്‍ പാല്‍ എടുക്കാന്‍ ബക്കറ്റുമായി പോയ മേരി മടങ്ങി വരാന്‍ വൈകിയതിനാല്‍ ഭര്‍ത്താവ് മാത്യു തോട്ടത്തിലേക്ക് ചെന്നപ്പോഴാണ് ഭാര്യ നിലത്തു വീണ് കിടക്കുന്നതു കണ്ടത്. തുടര്‍ന്ന് കുട്ടമ്പുഴ പൊലിസില്‍ വിവരമറിയിക്കുകയായിരുന്നു.
സംശയമുള്ള ചിലരെ ചോദ്യം ചെയ്തതില്‍നിന്ന് ലഭിച്ച സൂചനകളുടെ അടിസ്ഥാനത്തിലാണ് അയല്‍വാസിയായ കുഞ്ഞുമുഹമ്മദിനെ കസ്റ്റഡിയില്‍ എടുത്തത്. കൊലപാതക കാരണം വ്യക്തമല്ല. ഇയാള്‍ മാനസിക രോഗിയാണെന്ന് പറയപ്പെടുന്നുണ്ട്. പ്രതിയെ ഇന്ന് സംഭവസ്ഥലത്തെത്തിച്ച് തെളിവെടുപ്പ് നടത്തിയ ശേഷം കോടതിയില്‍ ഹാജരാക്കും.