ന്യൂഡല്‍ഹി: ആറുമാസത്തെ തടവുശിക്ഷ വിധിച്ചുകൊണ്ടുള്ള സുപ്രിം കോടതി ഉത്തരവിന്റെ പശ്ചാത്തലത്തില്‍ പിടികൊടുക്കാന്‍ തയാറാകാതെ കൊല്‍ക്കത്ത ഹൈക്കോടതി ജഡ്ജ് സി.എസ് കര്‍ണന്‍ പുതിയ നീക്കത്തിലേക്ക്. പ്രശ്‌നത്തില്‍ രാഷ്ട്രപതിയെ ഇടപെടുവിക്കാനാണ് അദ്ദേഹം ശ്രമം നടത്തുന്നത്.
അദ്ദേഹത്തിനുവേണ്ടി ഹൈക്കോടതിയിലെ ചില ജഡ്ജിമാര്‍, ജസ്റ്റിസ് കര്‍ണന്റെ മകന്‍ സി.എസ് സുഗന്‍ എന്നിവര്‍ രാഷ്ട്രപതിയുടെ സെക്രട്ടറി അശോക് മേത്തയെ സന്ദര്‍ശിച്ചതായി അഭിഭാഷകനായ മാത്യു ജെ. നെടുംപാറ വ്യക്തമാക്കി. ഭരണഘടനയിലെ 72ാം ആര്‍ട്ടിക്കിളിന്റെ അടിസ്ഥാനത്തില്‍ അദ്ദേഹത്തിനെതിരായ സുപ്രിം കോടതി ഉത്തരവ് സസ്‌പെന്‍ഡ് ചെയ്യണമെന്നാവശ്യപ്പെട്ടുള്ള അപേക്ഷയും രാഷ്ട്രപതിക്ക് സമര്‍പ്പിച്ചിട്ടുണ്ട്. രാഷ്ട്രപതിയുമായി വ്യക്തിപരമായ കൂടിക്കാഴ്ചക്കുള്ള അനുവാദവും ജസ്റ്റിസ് കര്‍ണന്‍ തേടിയിട്ടുണ്ട്.
സുപ്രിം കോടതി ഉത്തരവിന്റെ അടിസ്ഥാനത്തില്‍ ജസ്റ്റിസ് കര്‍ണനെ ഇതുവരെ അറസ്റ്റ് ചെയ്യാന്‍ പൊലിസിനായിട്ടില്ല. അദ്ദേഹത്തെ കണ്ടെത്തുന്നതിനായി പൊലിസ് തെരച്ചില്‍ തുടരുകയാണ്. അതിനിടയിലാണ് രാഷ്ട്രപതിയെ പ്രശ്‌നത്തില്‍ ഇടപെടുവിക്കാനാണ് കര്‍ണനും അദ്ദേഹത്തിന്റെ അഭിഭാഷകരും ശ്രമിക്കുന്നത്.
കഴിഞ്ഞ മെയ് ഒന്‍പതിനാണ് ചീഫ് ജസ്റ്റിസ് ജെ.എസ്.ഖെഹാര്‍ അധ്യക്ഷനായ ഏഴംഗ ബെഞ്ച് ജസ്റ്റിസ് കര്‍ണനെ ആറുമാസത്തെ തടവു ശിക്ഷക്ക് വിധിച്ചുകൊണ്ട് ഉത്തരവിട്ടത്. ഇതേതുടര്‍ന്ന് ഒളിവില്‍ പോയ ജസ്റ്റിസ് കര്‍ണനെ ഇതുവരെ കണ്ടെത്താനായിട്ടില്ല.