കൊച്ചി: ഗോകുലത്തിന്റെ വിശ്വസ്ത കാവല്‍ക്കാരനെ ടീമിലെത്തിച്ച് ബ്ലാസ്റ്റേഴ്‌സ്. കോഴിക്കോട് സ്വദേശിയായ 26കാരന്‍ ഷിബിന്‍ രാജ് കുനിയില്‍ ആണ് ബ്ലാസ്റ്റേഴ്‌സുമായി ഒപ്പുവച്ച മലയാളി താരം. സായിയുടെ ഭാഗമായി 2007ലാണ് ഷിബിന്‍ രാജ് തന്റെ ഫുട്‌ബോള്‍ കരിയര്‍ ആരംഭിക്കുന്നത്. 2009ല്‍ ജില്ലാ ടീമിനെ പ്രതിനിധീകരിച്ച് ആദ്യമായി കളത്തിലിറങ്ങി. 2010ല്‍ കൊല്‍ക്കത്തയില്‍ വച്ച് നടന്ന ബിസി റോയ് ട്രോഫിയില്‍ കേരള ടീമംഗമായിരുന്നു ഷിബിന്‍ രാജ്. 2010 ല്‍ ചൈനയില്‍ നടന്ന മത്സരത്തില്‍ 19വയസിന് താഴെയുള്ളവരുടെ ദേശീയ ടീമില്‍ ഇടംപിടിക്കാന്‍ ഷിബിന്‍ രാജിന്റെ മികച്ച പ്രകടനം സഹായിച്ചു. സുബ്രതോ കപ്പില്‍ മലബാര്‍ ക്രിസ്ത്യന്‍ കോളജ് ടീമില്‍ കളിച്ച ഷിബിന്‍ രാജ് മികച്ച കീപ്പറായി തിരഞ്ഞെടുക്കപ്പെട്ടു.
2011ല്‍ സ്‌കോളര്‍ഷിപ്പോടെ എയര്‍ഫോഴ്‌സില്‍ ചേര്‍ന്ന ഷിബിന്‍ രാജ് സര്‍വിസസ് ടീമിന്റെ ഭാഗമാവുകയും സന്തോഷ് ട്രോഫി നേടുകയും ചെയ്തു. പിന്നീട് 2016ല്‍ ഷിബിന്‍ മോഹന്‍ ബഗാന്‍ എഫ്.സിയില്‍ ചേര്‍ന്നു. 2018ല്‍ ഗോകുലം എഫ്.സി ടീമില്‍ ചേരുകയും ഐ ലീഗില്‍ 11 മത്സരങ്ങളില്‍ പങ്കെടുക്കുകയും ടീമിനെ നയിക്കുകയും ചെയ്തു.

ഷിബിന്‍ മികച്ച കീപ്പറാണെന്നും മികച്ച പരിശീലനം നല്‍കി അദ്ദേഹത്തിന്റെ കഴിവ് വികസിപ്പിക്കുന്നതിനുള്ള വേദിയൊരുക്കാമെന്ന് ഞങ്ങള്‍ പ്രതീക്ഷിക്കുന്നെന്നും കേരള ബ്ലാസ്റ്റേഴ്‌സ് പരിശീലകന്‍ എല്‍ക്കോ ഷട്ടോരി പറഞ്ഞു.