നമുക്കേറെ പരിചിതമാണ് മല്ലന്റേയും മാതേവന്റേയും കഥ. ആപത്തില്‍ ഉപേക്ഷിച്ചു പോയ ചങ്ങാതിയെ കുറിച്ചാണ് ആ കഥയില്‍ പറയുന്നത്. എന്നാല്‍ ഇവിടെയിതാ രക്ഷനെത്തുവോളം ആപത്തില്‍ പെട്ട സുഹൃത്തിനൊപ്പം കഴിഞ്ഞ ചങ്ങാതി. മറ്റാരുമല്ല ഒരു നായയാണ് ആ ചങ്ങാതി.

മരത്തില്‍ നിന്ന് വീണ സുഹൃത്ത് ജീസസ് ഹ്യൂച്ചിനെ തനിച്ചു വിടാതെ അയാളെ കെട്ടിപ്പിടിച്ചു കിടക്കുന്ന ടോണി എന്ന നായ ഇപ്പോള്‍ സോഷ്യല്‍ മീഡിയകളില്‍ താരമായിരിക്കുകയാണ്. അര്‍ജന്റീനയിലാണ് സംഭവം.  രക്ഷാപ്രവര്‍ത്തകരെത്തിയ ശേഷമാണ് ടോണി സുഹൃത്തിനരികില്‍ നിന്ന് മാറാന്‍ തയ്യാറായത്.

തെരുവില്‍ നിന്ന് ഗുരുതരമായ പരുക്കേറ്റ നിലയിലാണ് ടോണിയെ ഹ്യൂച്ചിന് ലഭിക്കുന്നത്. ആവശ്യമായ പരിചരണം നല്‍കി ടോണിയെ പൂര്‍വ്വ സ്ഥിതിയിലെത്തിച്ചു. ടോണിയുള്ളതു കൊണ്ടു മാത്രമാണ് താന്‍ രക്ഷപ്പെട്ടതെന്നാണ് ഹ്യൂച്ച് വിശ്വസിക്കുന്നത്.