റിയോ ഡി ജനീറോ: കോപ അമേരിക്ക ഫുട്‌ബോളില്‍ അര്‍ജന്റീന - ബ്രസീല്‍ മത്സരം വിവാദത്തിലേക്ക്. സെമി ഫൈനലില്‍ ബ്രസീല്‍ അര്‍ജന്റീനയെ എതിരില്ലാത്ത രണ്ടു ഗോളുകള്‍ക്ക് തോല്‍പ്പിച്ചിരുന്നു. എന്നാല്‍, മത്സരത്തില്‍ റഫറി പക്ഷപാതപരമായ തീരുമാനങ്ങളാണ് എടുത്തതെന്ന് അര്‍ജന്റീന ഫുട്‌ബോള്‍ ഫെഡറേഷന്‍ കോപ സംഘാടകര്‍ക്ക് പരാതി നല്‍കി. അര്‍ജന്റീനയ്ക്ക് ലഭിക്കേണ്ടിയിരുന്ന രണ്ട് പെനാല്‍റ്റികള്‍ റഫറി നിഷേധിച്ചെന്ന് പരാതിയില്‍ ചൂണ്ടിക്കാട്ടുന്നു. വിഡിയോ റഫറിയുടെ നിര്‍ദേശം മൈതാനത്തെ റഫറി അവഗണിച്ചെന്നും ആരോപണമുണ്ട്.

അതുകൊണ്ടുതന്നെ ഇരുവരും നടത്തിയ ഓഡിയോ സംഭാഷണം തങ്ങള്‍ക്ക് കിട്ടണമെന്ന് അര്‍ജന്റീന വ്യക്തമാക്കി. സൂപ്പര്‍താരങ്ങളായ ലയണല്‍ മെസ്സിയും സെര്‍ജിയോ അഗ്യൂറോയും മത്സരശേഷം പരാതിയുമായെത്തിയതിന് പിന്നാലെയാണ് അര്‍ജന്റീന ഫെഡറേഷന്‍ പ്രശ്‌നത്തില്‍ ഇടപെട്ടത്. വാര്‍ റഫറി ലിയോണ്ടന്‍ ഗോണ്‍സാലസ് അര്‍ജന്റീനയുടെ പെനാല്‍റ്റി അപ്പീലുകള്‍ ശരിയാണെന്ന് മൈതാനത്തെ റഫറിയായ റോഡി സാബ്രാനോയോട് പറഞ്ഞിരുന്നതായി ഒരു മാധ്യമം റിപ്പോര്‍ട്ട് പുറത്തുവിട്ടിരുന്നു. എന്നാല്‍, രണ്ടുതവണയും വാറിന്റെ നിര്‍ദേശം റഫറി അവഗണിച്ചു. ബ്രസീല്‍ പ്രസിഡന്റ് ജെയിര്‍ ബോള്‍സനാരോ സംഭവത്തില്‍ ഇടപെട്ടതായും ചില റിപ്പോര്‍ട്ടുകളുണ്ട്.