കോഴിക്കോട്: വിദ്യാര്‍ഥികളെ ലക്ഷ്യംവച്ച് ലഹരി മാഫിയ സ്‌കൂളുകള്‍ മുതല്‍ കലാലയങ്ങള്‍ വരെ ലഹരി വ്യാപന പദ്ധതികള്‍ ആസൂത്രണം ചെയ്ത് ഒരു സമൂഹത്തിന്റെ ഭാവി തന്നെ അപകടത്തില്‍പ്പെടുത്തുന്നതിനെതിരേ ജമാഅത്തുകളും സുന്നി യുവജന സംഘം ശാഖാ കമ്മിറ്റികളും ജാഗ്രതയോടെ കര്‍മ രംഗത്തിറങ്ങണമെന്ന് സുന്നി യുവജന സംഘം സംസ്ഥാന സെക്രട്ടേറിയറ്റ് ആഹ്വാനം ചെയ്തു.

സയ്യിദ് മുഹമ്മദ് കോയ തങ്ങള്‍ ജമലുല്ലൈലിയുടെ അധ്യക്ഷതയില്‍ ഉമര്‍ ഫൈസി മുക്കം ഉദ്ഘാടനം ചെയ്തു. ഇസ്‌ലാമിക സമൂഹത്തിന്റെ ആഭ്യന്തര ഭദ്രതയും മഹല്ല് ജമാഅത്തുകളുടെ ഇടപെടലുകളും കാരണം ലഹരി വിമുക്ത മഹല്ലുകളായി ഒരു പരിധിവരെയെങ്കിലും മുസ്‌ലിംകളെ രക്ഷിച്ചെടുക്കാന്‍ കഴിഞ്ഞിട്ടുണ്ട്. എന്നാല്‍ കലാലയങ്ങള്‍ കേന്ദ്രീകരിച്ച് ലഹരിയും മയക്കുമരുന്നുകളും വിപണനം നടക്കുന്ന വിവരങ്ങളാണ് പുറത്ത് വരുന്നത്. മദ്യവിപത്തിനെതിരേ ശക്തമായ ബോധവല്‍ക്കരണം വേണമെന്നും സെക്രട്ടേറിയറ്റ് ആവശ്യപ്പെട്ടു.

ഓഗസ്റ്റ് മാസത്തില്‍ സംസ്ഥാന കൗണ്‍സില്‍ ക്യാംപ് പാലക്കാട്ട് നടക്കും.സുന്നി അഫ്കാര്‍ വാരിക പ്രൊജക്ട് റിപ്പോര്‍ട്ട് കോ ഓഡിനേറ്റര്‍ ടി.കെ മുഹമ്മദ് കുട്ടി ഫൈസി അവതരിപ്പിച്ചു. ഭരണഘടനാ കരട് നിര്‍ദേശങ്ങള്‍ ഹംസ റഹ്മാനി കൊണ്ടിപറമ്പ് അവതരിപ്പിച്ചു. ആമില പ്രൊജക്ട് സലീം എടക്കര അവതരിപ്പിച്ചു. പി.കെ ഇമ്പിച്ചിക്കോയ തങ്ങള്‍ പ്രാര്‍ഥന നടത്തി. പിണങ്ങോട് അബൂബക്കര്‍ സ്വാഗതം പറഞ്ഞു. ചര്‍ച്ചയില്‍ കെ.എ റഹ്മാന്‍ ഫൈസി, പുത്തനഴി മൊയ്തീന്‍ ഫൈസി, സി.എച്ച് മഹ്മൂദ് സഅദി, നാസര്‍ ഫൈസി കൂടത്തായി, ഒ.എം ശരീഫ് ദാരിമി, നിസാര്‍ പറമ്പന്‍, മലയമ്മ അബൂബക്കര്‍ ബാഖവി, നാസര്‍ ഫൈസി കൂടത്തായി, ഇബ്രാഹിം ഫൈസി പേരാല്‍, അലവി ഫൈസി കുളപ്പറമ്പ് , മുസ്തഫ മുണ്ടുപാറ, ലത്തീഫ് ഹാജി ബംഗളൂരു സംസാരിച്ചു.