തിരുവനന്തപുരം: പൊലിസിന്റെ മൂന്നാംമുറ അവസാനിപ്പിക്കേണ്ട കാലം കഴിഞ്ഞുവെന്ന് ഭരണപരിഷ്‌കാര കമ്മിഷന്‍ അധ്യക്ഷന്‍ വി.എസ് അച്യുതാനന്ദന്‍. വായന പക്ഷാചരണത്തിന്റെ ഭാഗമായി ചിന്ത പബ്ലിഷേഴ്‌സിന്റെ ആഭിമുഖ്യത്തില്‍ സ്റ്റേറ്റ് സെന്‍ട്രല്‍ ലൈബ്രറി ഹാളില്‍ സംഘടിപ്പിച്ച പുസ്തകോത്സവും പുസ്തക പ്രകാശനവും ഉദ്ഘാടനം ചെയ്യുകയായിരുന്നു അദ്ദേഹം.
പൊലിസ് സേനയിലെ കുറ്റവാളികളും അഴിമതിക്കാരുമായ വിഭാഗമാണ് ഈ മനുഷ്യാവകാശ ലംഘനം തുടരുന്നത്. മര്‍ദനം വലിയ മിടുക്കായി കാണുന്ന പൊലിസുകാരുണ്ട്. അവരാണ് ക്രൂരതയുടെ ആശാന്മാര്‍. തല്ലലും കൊല്ലലും കാടത്ത സംസ്‌കാരമാണെന്ന് അവരെ പഠിപ്പിക്കണം. തിരുത്താന്‍ കഴിയാത്തവരെ സേനയില്‍നിന്ന് പുറത്താക്കണമെന്നും വി.എസ് പറഞ്ഞു.