കല്‍പ്പറ്റ: എട്ട് മാസക്കാലമായി മുടങ്ങിക്കിടക്കുന്ന 15 കോടി രൂപയോളം വരുന്ന തൊഴിലുറപ്പ് കുടിശിക വേതനം ഉടന്‍ വിതരണം ചെയ്യണമെന്നാവശ്യപ്പെട്ട്  ഐ.എന്‍.ടി.യു.സി ജില്ലാകമ്മിറ്റിയുടെ നേതൃത്വത്തില്‍ കലക്‌ട്രേറ്റിലേക്ക് മാര്‍ച്ചും ധര്‍ണയും നടത്തി.
തൊഴിലുറപ്പ് പദ്ധതി അട്ടിമറിക്കാനുള്ള കേന്ദ്രസര്‍ക്കാരിന്റെ ഗൂഢശ്രമത്തിന് സംസ്ഥാന സര്‍ക്കാരും കൂട്ടുനില്‍ക്കുകയാണ്.
കാര്‍ഷികമേഖലയിലേക്ക് കൂടി തൊഴിലുറപ്പ് പദ്ധതി വ്യാപിപ്പിക്കാനും, എല്ലാകുടുംബങ്ങള്‍ക്കും 100 ദിവസം തൊഴില്‍ ഉറപ്പാക്കാനും സംസ്ഥാനസര്‍ക്കാര്‍ സാഹചര്യമൊരുക്കണം.
സംസ്ഥാനം മുഴുവന്‍ 626 കോടി രൂപ കുടിശ്ശിക വേതനയിനത്തില്‍ മുടങ്ങിക്കിടക്കുതിനെതിരെയും പദ്ധതി നടത്തിപ്പിലെ കെടുകാര്യസ്ഥതക്കെതിരെയും ഐ എന്‍ ടി യു സി സംസ്ഥാന കമ്മിറ്റിയുടെ ആഹ്വാനപ്രകാരം 14 ജില്ലാകലക്‌ട്രേറ്റിലേക്കുള്ള സമരപരിപാടിയുടെ ഭാഗമായാണ് ജില്ലയിലും സമരം സംഘടിപ്പിച്ചത്. ലോക്കൗട്ട് ചെയ്ത ചെമ്പ്ര എസ്റ്റേറ്റ് തൊഴിലാളികള്‍ക്ക് സൗജന്യ റേഷന്‍ വിതരണം ചെയ്യുന്നതിന് സര്‍ക്കാര്‍ നടപടി സ്വീകരിക്കണമെന്നും ഐ.എന്‍.ടി.യു.സി ആവശ്യപ്പെട്ടു.
ജില്ലാപ്രസിഡന്റ് പി.പി ആലി അധ്യക്ഷനായി. കെ.പി.സി.സി എക്‌സിക്യുട്ടീവ് അംഗം എന്‍.ഡി അപ്പച്ചന്‍ ഉദ്ഘാടനം ചെയ്തു.