ചണ്ഡീഗഢ്: കേന്ദ്രസര്‍ക്കാറിന്റെ കാര്‍ഷിക നിയമങ്ങള്‍ക്കെതിരേ പ്രതിഷേധവുമായി വിവിധ സംസ്ഥാനങ്ങളിലെ കര്‍ഷകര്‍ രാജ്യതലസ്ഥാനത്തേക്ക് നടത്തുന്ന 'ഡല്‍ഹി ചലോ' മാര്‍ച്ചിന് പിന്നില്‍ പഞ്ചാബ് മുഖ്യമന്ത്രി അമരീന്ദര്‍ സിങ്ങാണെന്ന് ഹരിയാന മുഖ്യമന്ത്രി മനോഹര്‍ ലാല്‍ ഖട്ടര്‍ ആരോപിച്ചു.

പഞ്ചാബ് മുഖ്യമന്ത്രിയുടെ ഓഫിസില്‍ നിന്നുള്ളവരാണ് സമരം നയിക്കുന്നതെന്നും ഖട്ടര്‍ ആരോപിക്കുകയുണ്ടായി. 'പഞ്ചാബിലെ കര്‍ഷകരാണ് പ്രതിഷേധിക്കുന്നത്. ഹരിയാനയിലെ കര്‍ഷകര്‍ മാറിനിന്നു. സംയമനം പാലിച്ചതിന് ഹരിയാനയിലെ കര്‍ഷകര്‍ക്കും പൊലിസിനും നന്ദി പറയുന്നു. ഈ സമരത്തിന് ഉത്തരവാദി പഞ്ചാബ് മുഖ്യമന്ത്രിയാണെന്നും ഖട്ടര്‍ മാധ്യമങ്ങളോട് പറഞ്ഞു.

പഞ്ചാബ് മുഖ്യമന്ത്രി അമരീന്ദര്‍ സിങ്ങും ഹരിയാന മുഖ്യമന്ത്രി ഖട്ടറും ട്വിറ്ററില്‍ കഴിഞ്ഞ ദിവസം ഏറ്റുമുട്ടല്‍ നടത്തിയിരുന്നു. പഞ്ചാബില്‍ കര്‍ഷകര്‍ സമാധാനപരമായാണ് സമരം ചെയ്തതെന്നും ഹരിയാന സര്‍ക്കാര്‍ അവരെ പ്രകോപിതരാക്കുന്നുവെന്നുമാണ് അമരീന്ദര്‍ ആരോപിച്ചത്. എന്നാല്‍ അതേസമയം ഞാനിതില്‍ രാഷ്ട്രീയം കാണുന്നില്ലെന്നും നിഷ്‌കളങ്കരായ കര്‍ഷകരെ ഇളക്കിവിടുന്നത് നിര്‍ത്തണമെന്നും ഖട്ടര്‍ പറഞ്ഞു.