നെടുമ്പാശേരി: അന്താരാഷ്ട്ര വിമാനത്താവളത്തില്‍ മയക്കുമരുന്ന് പിടികൂടിയ കേസില്‍ നാല് പ്രതികള്‍ കൂടി കസ്റ്റംസിന്റെ വലയിലായി. മഞ്ചേരി സ്വദേശികളായ റഫീഖ്,ഹാരിസ്, മലപ്പുറം സ്വദേശി ജംഷീര്‍ അലി, തലശേരി സ്വദേശി ഷഫീഖ് എന്നിവരാണ് അറസ്റ്റിലായത്. കഴിഞ്ഞ ജനുവരി 27 ന് പിടിയിലായ കേസുമായി ബന്ധപ്പെട്ടാണ് ഇപ്പോള്‍ നാല് പേര്‍ അറസ്റ്റിലായത്. ഇവര്‍ അന്വേഷണ ഉദ്യോഗസ്ഥര്‍ക്ക് മുന്നില്‍ കീഴടങ്ങുകയായിരുന്നു.

എയര്‍ ഇന്ത്യ എക്‌സ്പ്രസ് വിമാനത്തില്‍ ദോഹയിലേക്ക് കടത്താന്‍ ശ്രമിച്ച 1.6 കിലോഗ്രാം ഹാഷിഷുമായി മലപ്പുറം കൂനോല്‍മാട് പുത്തൂര്‍പളളിക്കല്‍ പട്ടയില്‍ വീട്ടില്‍ മുബാഷര്‍(22) കഴിഞ്ഞ ജനുവരിയില്‍ പിടിയിലായിരുന്നു. ഇയാളില്‍നിന്നു പിടിച്ചെടുത്ത ഹാഷിഷിന് ഒന്നര കോടിയിലേറെ രൂപ വില വരും. മയക്കുമരുന്ന് പൊതികളിലാക്കി ബാഗേജില്‍ ഒളിപ്പിച്ചിരിക്കുകയായിരുന്നു. ബാഗേജ് പരിശോധന നടത്തിയ സുരക്ഷാ ഉദ്യോഗസ്ഥരാണ് മയക്കുമരുന്ന് കണ്ടെത്തിയത്. തുടര്‍ന്ന് കസ്റ്റംസിന് കൈമാറുകയായിരുന്നു. കസ്റ്റംസ് ഉദ്യോഗസ്ഥര്‍ ഇയാളെ ചോദ്യം ചെയ്തതില്‍ നിന്നും ഇയാള്‍ കരിയര്‍ മാത്രമാണെന്ന് വ്യക്തമായി. ഇതേതുടര്‍ന്നാണ് കേസില്‍ തുടരന്വേഷണം നടത്താന്‍ തീരുമാനിച്ചത്.