തിരുവനന്തപുരം: പെട്രോളിനും ഡീസലിനും എക്‌സൈസ് തീരുവയും റോഡ് സെസും ലിറ്ററിന് ഓരോ രൂപ വച്ച് അധികം ചുമത്തിയ കേന്ദ്രബജറ്റ് പ്രഖ്യാപനം വന്‍ വിലക്കയറ്റത്തിനു കാരണമാകുമെന്ന് പ്രതിപക്ഷ നേതാവ് രമേശ് ചെന്നിത്തല. പെട്രോളിന്റെയും ഡീസലിന്റെയും പേരില്‍ വന്‍ കൊള്ളയാണ് നേരത്തെ തന്നെ നടത്തി വന്നിരുന്നത്. അത് അവസാനിപ്പിക്കുന്നതിനു പകരം വീണ്ടും കൊള്ള ശക്തിയായി തുടരുകയാണ്. ഇതുവഴി തങ്ങളെ വോട്ട് ചെയ്ത് അധികാരത്തിലേറ്റിയ ജനത്തെ ശിക്ഷിക്കുകയാണ് മോദി സര്‍ക്കാര്‍ ചെയ്തിരിക്കുന്നത്.
ബജറ്റില്‍ കേരളത്തെ പൂര്‍ണമായും അവഗണിച്ചു.

അര്‍ഹമായ നികുതിവിഹിതം നല്‍കിയില്ലെന്നു മാത്രമല്ല, പ്രളയത്തില്‍ കനത്ത നാശനഷ്ടമുണ്ടായ കേരളത്തിന് ആശ്വാസം നല്‍കുകയും ചെയ്തില്ല. റബര്‍ മേഖലയ്ക്കും കശുവണ്ടി മേഖലയ്ക്കും കനത്ത പ്രഹരമാണുണ്ടായത്. കോര്‍പറേറ്റുകള്‍ക്കു രാജ്യത്തിന്റെ സമ്പത്ത് വാരിക്കോരി നല്‍കുന്ന മുന്‍സമീപനം തുടരുകയാണ് നിര്‍മലാ സീതാരാമന്റെ ബജറ്റും ചെയ്തിരിക്കുന്നത്. അതേസമയം കാര്‍ഷിക, ഫിഷറീസ് രംഗത്തെ അവഗണിക്കുകയും ചെയ്തു. തൊഴിലില്ലായ്മ പരിഹരിക്കാനുള്ള നടപടികളും സ്വീകരിച്ചിട്ടില്ല.