കൊച്ചി: എറണാകുളം പാലാരിവട്ടം ചക്കരപ്പറമ്പിൽ കെ.എസ്.ആർ.ടി.സി ബസ് മരത്തിലിടിച്ചുണ്ടായ അപകടത്തിൽ ഡ്രൈവർ മരിച്ചു. തിരുവനന്തപുരം സ്വദേശി അരുൺ സുകുമാർ (45) ആണ് മരിച്ചത്. 25 ഓളം പേർക്ക് പരിക്കേറ്റു. നാല് പേരുടെ നില ഗുരുതരമാണ്. ബസിലെ കണ്ടക്ടറും ഗുരുതരാവസ്ഥയിലാണ്.

തിരുവനന്തപുരത്ത് നിന്ന് വയനാട്ടിലേക്ക് പോകുകയായിരുന്ന സൂപ്പർ ഡീലക്‌സ് ബസ് ആണ് പുലർച്ചെ അപകടത്തിൽ പെട്ടത്. പുലർച്ചെ നാലരയോടെ നാലുവരിപ്പാതയുടെ സമീപത്തുള്ള മരത്തിലേക്ക് ബസ് ഇടിച്ചുകയറുകയായിരുന്നു. അപകടത്തിൽ മരം കടപുഴങ്ങിയിരുന്നു. പൊലിസും ഫയർ ഫോഴ്‌സും സ്ഥലത്തെത്തിയാണ് വാഹനത്തിനുള്ളിൽ കുടുങ്ങിയവരെ പുറത്തെത്തിച്ചത്.

ഡ്രൈവർ ഉറങ്ങിപ്പോയതാകാം അപകടകാരണമെന്നാണ് പ്രാഥമിക വിവരം. ഡ്രൈവറുടെ മൃതദേഹം സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്. മൃതദേഹം പോസ്റ്റ്‌മോർട്ടത്തിനായി ജനറൽ ആശുപത്രിയിലേക്ക് മാറ്റും.