കണ്ണൂര്‍: കണ്ണൂര്‍ ജില്ലയിലേക്ക് ലഹരി ഗുളിക മൊത്തക്കച്ചവടം നടത്തുന്നതില്‍ പ്രധാനകണ്ണിയായ യുവാവിനെ എക്‌സൈസ് ആന്റി നാര്‍കോട്ടിക്ക് സ്‌പെഷല്‍ സ്‌ക്വാഡ് സര്‍ക്കിള്‍ ഇന്‍സ്‌പെക്ടര്‍ സതീഷ് കുമാറിന്റെ നേതൃത്വത്തില്‍ അറസ്റ്റുചെയ്തു. തിരുവങ്ങാട് സ്വദേശി കെ.കെ ഹൗസില്‍ ഹര്‍ഷാദ് (32) ആണ് അറസ്റ്റിലായത്. ഡെപ്യൂട്ടി എക്‌സൈസ് കമ്മിഷണര്‍ പി.കെ സുരേഷിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് ഒരു ഹോണ്ട സിറ്റി കാര്‍ സഹിതം ഹര്‍ഷാദിനെ പിടികൂടിയത്. 250 എണ്ണം സ്പാസ്‌മോ പ്രോക്‌സിവോണ്‍ ഗുളികകളാണ് ഇയാളുടെ പക്കല്‍ നിന്നും പിടിച്ചെടുത്തത്.
ദിവസങ്ങളോളം വേഷംമാറി രഹസ്യനിരീക്ഷണം നടത്തിയാണ് ഇയാളെ എക്‌സൈസ് ഉദ്യോഗസ്ഥര്‍ക്ക് പിടികൂടാന്‍ കഴിഞ്ഞത്. ഉത്തര മേഖലാ ജോയന്റ് എക്‌സൈസ് കമ്മിഷണര്‍ സ്‌പെഷല്‍ സ്‌ക്വാഡ് അംഗങ്ങളായ പി.പി ജലീഷ്, കെ. ബിനീഷ്, എക്‌സൈസ് നാര്‍കോട്ടിക്ക് സ്‌പെഷല്‍ സ്‌ക്വാഡ് അംഗങ്ങളായ പ്രിവന്റിവ് ഓഫിസര്‍ സി.വി ദിലീപ്, സിവില്‍ എക്‌സൈസ് ഓഫിസര്‍മാരായ സി. പങ്കജാക്ഷന്‍, പി.എം.കെ സജിത് കുമാര്‍, പി.ടി ശരത്, പി. സീമ, എക്‌സൈസ് ഡ്രൈവര്‍ പി. ഷജിത്ത് എന്നിവരുമുണ്ടായിരുന്നു. ഹര്‍ഷാദിനെ ഇന്ന് തലശ്ശേരി എ.സി.ജെ.എം കോടതിയില്‍ ഹാജരാക്കും.