കണിച്ചാര്‍: ചാണപ്പാറ ദേവീ ക്ഷേത്രത്തിലെ പഞ്ചലോഹ വിഗ്രഹം മോഷണം പോയി. മുകളിലെ ചാണപ്പാറയിലെ റോഡരികില്‍ സ്ഥിതി ചെയ്യുന്ന ദേവീ ക്ഷേത്രത്തിലെ ശ്രീകോവില്‍ കുത്തി തുറന്നാണ് പഞ്ചലോഹ വിഗ്രഹം മോഷ്ടിച്ചത്. രാവിലെ ക്ഷേത്രത്തിലെത്തിയ ഭക്തരാണ് ശ്രീകോവില്‍ തുറന്ന് കിടക്കുന്നത് കണ്ടത്.
ഉടന്‍ ക്ഷേത്ര ഭാരവാഹികളെയും നാട്ടുകാരെയും വിവരമറിയിക്കുകയും ചെയ്തു. ക്ഷേത്രത്തിലെ രണ്ട് ഭണ്ഡാരവും സമീപത്തെ സതീശന്റെ കടയിലെ പണവും മോഷ്ടിച്ചു.
സമീപത്ത് ഒരു ബെല്‍റ്റും കമ്പിപ്പാരയും കുടയും കണ്ടെത്തിയിട്ടുണ്ട്. കഴിഞ്ഞ ആഴ്ചയും ക്ഷേത്രത്തിന്റെ ഭണ്ഡാരം തകര്‍ത്ത് പണം മോഷ്ടിച്ചിരുന്നു. ബുധനാഴ്ച പുലര്‍ച്ചെയാണ് സംഭവം.സംഭവത്തില്‍ കേളകം പൊലിസ് കേസെടുത്തു.
വിരലടയാള വിദഗ്ധരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി.
ക്ഷേത്രം ശ്രീകോവിലിലും കൗണ്ടറിലും ഭണ്ഡാരത്തിലും പരിശോധന നടത്തിയ വിരലടയാള വിദഗ്ധര്‍ ഇതില്‍നിന്ന് തെളിവുകള്‍ ശേഖരിച്ചിട്ടുണ്ട്. മോഷണം നടന്ന കടയിലും വിരലടയാള വിദഗ്ധര്‍ പരിശോധന നടത്തി. കണ്ണൂരില്‍ നിന്നും എത്തിയ ഡോഗ് സ്‌ക്വാഡ് ക്ഷേത്രത്തിന് സമീപം മോഷ്ടാക്കള്‍ ഉപേക്ഷിച്ച കമ്പിപ്പാര, കുട, ടോര്‍ച്ച്, പ്ലാസ്റ്റിക്, ഭണ്ഡാരം എന്നിവയില്‍നിന്നും മണംപിടിച്ച് സമീപത്തെ ഇടവഴിയിലൂടെ ഒരുകിലോമീറ്ററോളം സഞ്ചരിച്ചശേഷം ചെങ്കല്‍ പണയ്ക്ക് സമീപം നിലയുറപ്പിക്കുകയായിരുന്നു.