വടക്കാഞ്ചേരി: അടാട്ട് ഫാര്‍മേഴ്‌സ് ബാങ്കില്‍ സഹകരണ വകുപ്പ് നടത്തിയ പരിശോധനയുടെ അടിസ്ഥാനത്തില്‍ തനിക്കെതിരേ വിജിലന്‍സ് അന്വേഷണത്തിന് ഉത്തരവിട്ടെന്ന സി.പി.എം പ്രചാരണം അടിസ്ഥാനരഹിതമെന്ന് അനില്‍ അക്കര എം.എല്‍.എ. വ്യാജ പ്രചാരണം പിന്‍വലിച്ച് മാപ്പുപറഞ്ഞില്ലെങ്കില്‍ സി.പി.എം ജില്ലാ സെക്രട്ടറി കെ. രാധാകൃഷ്ണന്‍ ഉള്‍പ്പെടെയുള്ളവര്‍ക്കെതിരേ നിയമനടപടി സ്വീകരിക്കും.
സംഭവത്തില്‍ മുഖ്യമന്ത്രി പിണറായി വിജയനും സഹകരണ മന്ത്രി കടകംപള്ളി സുരേന്ദ്രനുമാണ് നിയമസഭയില്‍ മറുപടി നല്‍കിയത്. മുഖ്യമന്ത്രിയുടെ മറുപടിയില്‍ ബാങ്ക് സ്വകാര്യ കമ്പനിക്ക് നല്‍കിയ 15 കോടി രൂപയെക്കുറിച്ചും വായ്പാ കുടിശ്ശിക ഇളവുകള്‍ നല്‍കിയതിനെക്കുറിച്ചുമാണ് അന്വേഷണത്തിന് ശുപാര്‍ശ ചെയ്തത്.
വ്യക്തികള്‍ക്കെതിരേ അന്വേഷണത്തിന് ഉത്തരവിട്ടിട്ടില്ല. സഹകരണ മന്ത്രി നല്‍കിയ മറുപടിയില്‍ അനില്‍ അക്കരക്ക് നല്‍കിയിട്ടുള്ള പലിശ ഇളവുകള്‍ നിയമാനുസൃതമാണെന്നും സഹകരണ വകുപ്പ് അന്വേഷണം നടത്തിയിട്ടില്ലെന്ന് വ്യക്തമാക്കുന്നതായും അദ്ദേഹം പറഞ്ഞു.