മീററ്റ്: ലൗ ജിഹാദ് ആരോപിച്ച് യുവതിയെ ഉത്തര്‍പ്രദേശ് പൊലിസ് മര്‍ദിച്ച സംഭവത്തില്‍ കൂടുതല്‍ വിവരങ്ങള്‍ പുറത്ത്. താനും മുസ്്‌ലിം യുവാവും ഒരുമിച്ചിരുന്ന് പഠിക്കുന്നതിനിടെ ബജ്‌റംഗ്ദള്‍ പ്രവര്‍ത്തകര്‍ അതിക്രമിച്ച് കയറുകയായിരുന്നെന്ന് യുവതി വെളിപ്പെടുത്തി. അവര്‍ മുറി പൂട്ടുകയും സുഹൃത്തായ യുവാവിനെ മര്‍ദിക്കുകയുമായിരുന്നു. തന്റെ ഐ.ഡി കാര്‍ഡ് നോക്കിയ അക്രമി സംഘം മുസ്്‌ലിം യുവാവിനെ എന്തിന് വിവാഹം ചെയതുവെന്ന് ചോദിച്ച് മര്‍ദിച്ചു. ശേഷം അവര്‍ പൊലിസിന് കൈമാറി. രണ്ടു പേരെയും രണ്ടു വാഹനങ്ങളിലാക്കി പൊലിസ് സ്റ്റേഷനിലേക്ക് കൊണ്ടുവരികയായിരുന്നുവെന്നും യുവതി പറഞ്ഞു.
സ്റ്റേഷനില്‍ യുവാവിനെതിരേ മാനഭംഗത്തിന് പരാതി നല്‍കണമെന്ന് പൊലിസ് ആവശ്യപ്പെട്ടുവെങ്കിലും താന്‍ വിസമ്മതിച്ചു. ഇതിനെ തുടര്‍ന്ന് പൊലിസ് തന്നെ മര്‍ദിച്ചുവെന്നും യുവതി കൂട്ടിച്ചേര്‍ത്തു. കഴിഞ്ഞ ദിവസമാണ് ലൗജിഹാദ് ആരോപിച്ച് യുവതിയെ പൊലിസ് മര്‍ദിക്കുന്ന ദൃശ്യങ്ങള്‍ പുറത്തുവന്നത്. പൊലിസ് വാനില്‍ യുവതിയെ ഹോം ഗാര്‍ഡും വനിതാ കോണ്‍സ്റ്റബിളും ഉള്‍പ്പെടെ നാലു പൊലിസുകാരാണ് മര്‍ദിച്ചത്. മുസ്‌ലിമിനൊപ്പം ജീവിക്കുന്നതില്‍ നാണക്കേട് തോന്നുന്നില്ലേ എന്ന് ചോദിച്ചായിരുന്നു മര്‍ദനം. സംഭവത്തില്‍ ഉള്‍പ്പെട്ട നാലു പൊലിസുകാരെയും സസ്‌പെന്‍ഡ് ചെയ്തിരുന്നു. ഇവര്‍ക്കെതിരേ വകുപ്പുതല അന്വേഷണവും പ്രഖ്യാപിച്ചിട്ടുണ്ട്.