എല്ലാ വകുപ്പുകളിലേക്കും ഇതു സംബന്ധിച്ച സര്‍ക്കുലര്‍ അയച്ചിട്ടുണ്ടെന്നും മുഖ്യമന്ത്രി അറിയിച്ചു
ഭോപ്പാല്‍: ജോലിയില്‍ പ്രാവീണ്യം കാണിക്കാത്തവരെ സര്‍ക്കാര്‍ സര്‍വിസില്‍ നിന്ന് നിര്‍ബന്ധിത രാജിക്ക് സമ്മര്‍ദം ചെലുത്തുമെന്ന് മധ്യപ്രദേശ് സര്‍ക്കാര്‍. ഇത്തരത്തിലൊരു പദ്ധതിക്ക് സര്‍ക്കാര്‍ രൂപം നല്‍കിയിട്ടുണ്ടെന്ന് മുഖ്യമന്ത്രി കമല്‍നാഥ് അറിയിച്ചു.

സര്‍ക്കാരിനു കീഴിലുള്ള എല്ലാ വകുപ്പുകളിലേക്കും ഇതുസംബന്ധിച്ച സര്‍ക്കുലര്‍ അയച്ചിട്ടുണ്ടെന്നും മുഖ്യമന്ത്രി അറിയിച്ചു. ജോലിയില്‍ പ്രാവീണ്യം കാണിക്കാത്തവര്‍, വകുപ്പുതല നടപടികള്‍ നേരിടുന്നവര്‍, അഴിമതിക്ക് നടപടി നേരിടുന്നവരെയെല്ലാം നിര്‍ബന്ധിത വിരമിക്കലിന് പ്രേരിപ്പിക്കാനാണ് സര്‍ക്കാര്‍ തീരുമാനം.

പിരിച്ചുവിടുന്നവരുടെ പട്ടികയില്‍ 50 വയസ് കഴിഞ്ഞവരേയോ അല്ലെങ്കില്‍ സര്‍ക്കാര്‍ സര്‍വിസില്‍ 20 വര്‍ഷം പൂര്‍ത്തിയാക്കിയവരേയോ ആയിരിക്കും പരിഗണിക്കുകയെന്ന് സര്‍ക്കാര്‍ പറയുന്നു.
എല്ലാ വകുപ്പുകളിലേയും മേലധികാരികളുമായി നടത്തിയ ചര്‍ച്ചയുടെ അടിസ്ഥാനത്തിലാണ് സര്‍ക്കാര്‍ ഇത്തരത്തിലൊരു തീരുമാനത്തില്‍ എത്തിയത്. കാര്യശേഷിയുള്ള ഉദ്യോഗസ്ഥരെ ഉപയോഗപ്പെടുത്തി സര്‍ക്കാരിന്റെ പ്രവര്‍ത്തനങ്ങളെ കാര്യക്ഷമമാക്കുകയെന്നതാണ് ലക്ഷ്യമെന്ന് മുഖ്യമന്ത്രി പറഞ്ഞു. ഒരു മാസത്തിനകം സര്‍ക്കാരിന് വകുപ്പ് മേലധികാരികള്‍ റിപ്പോര്‍ട്ട് സമര്‍പ്പിക്കണമെന്നാണ് മുഖ്യമന്ത്രി ഉത്തരവിട്ടതെന്ന് ചീഫ് സെക്രട്ടറി പറഞ്ഞു.