ഗൂഡല്ലൂര്‍: ഇഷ്ടഭക്ഷണമായ ചക്ക തേടി കാട്ടാനകള്‍ നാട്ടിലിറങ്ങാന്‍ തുടങ്ങിയതോടെ ജനം ഭീതിയിലായി. രാവെന്നോ പകലെന്നോ ഇല്ലാതെയാണ് ആനക്കൂട്ടങ്ങള്‍ ജനവാസ കേന്ദ്രങ്ങളിലടക്കം ചക്ക തേടിയെത്തുന്നത്. നീലഗിരിയിലെ മിക്ക പ്രദേശങ്ങളിലും ഇത്തരത്തില്‍ ആനക്കൂട്ടങ്ങള്‍ നാട്ടിലിറങ്ങിയിട്ടുണ്ട്. കഴിഞ്ഞ ദിവസം ദേവര്‍ഷോലയിലെ കെണിയംവയല്‍, മൂന്നാംനമ്പര്‍, വുഡ്ബ്രയര്‍, മേഫീല്‍ഡ്, നെല്ലാക്കോട്ടയിലെ പാട്ടവയല്‍, പാക്കണ, ബിദര്‍ക്കാട്, മുക്കട്ടി, സൂസന്‍പാടി, വിലങ്ങൂര്‍, ഒന്‍പതാം മൈല്‍ തുടങ്ങിയ പ്രദേശങ്ങളിലെല്ലാം ആനക്കൂട്ടം നാട്ടിലിറങ്ങി. കഴിഞ്ഞ ദിവസം രാത്രി വിലങ്ങൂരിലെത്തിയ കാട്ടാന കൃഷികള്‍ നശിപ്പിച്ചതിന് ശേഷം വൈദ്യുതി കമ്പിയിലേക്ക് കമുക് മറിച്ചിട്ടതോടെ ഗ്രാമം മുഴുവന്‍ ഇരുട്ടിലുമായി.