ന്യൂയോര്‍ക്ക്: ഇസ്‌റാഈല്‍ അധിനിവേശ വിഷയത്തില്‍ ശക്തമായ വിമര്‍ശനവുമായി ഫലസ്തീന്‍ പ്രസിഡന്റ് മഹ്മൂദ് അബ്ബാസ്. ജറുസലം വില്‍പ്പനയ്ക്കില്ല എന്നു പറഞ്ഞാണ് അദ്ദേഹം പ്രസംഗം തുടങ്ങിയത്. കയ്യടിയുടെ അകമ്പടിയോടെയാണ് ഈ വാചകം പൊതുസഭ സ്വീകരിച്ചത്.

ഇസ്‌റാഈലിന്റെ വംശീയാധിഷ്ടിതമായ നിമയം, ട്രംപ് ഭരണകൂടത്തിന്റെ ഇസ്‌റാഈലിനുള്ള പിന്തുണ, യു.എന്‍ പ്രമേയം അംഗീകരിക്കാനുള്ള ഇരുരാജ്യങ്ങളുടെയും വിമുഖത എന്നിവയെ പിന്നീട് അദ്ദേഹം വിമര്‍ശിച്ചു.

ഇസ്‌റാഈല്‍ നിയമം വംശീയമായൊരു രാജ്യ നിര്‍മാണത്തിലേക്കാണ് നയിക്കുക. അതുകൊണ്ടു തന്നെ രണ്ടു-രാജ്യ പരിഹാരമെന്ന ഫോര്‍മുല തന്നെ ദുല്‍ബ്ബലപ്പെടുത്തുന്നു- മഹ്മൂദ് അബ്ബാസ് പറഞ്ഞു.

തെല്‍അവീവില്‍ നിന്ന് യു.എസ് എംബസി ജറുസലമിലേക്ക് മാറ്റിയതിനു ശേഷമുള്ള മഹ്മൂദ് അബ്ബാസിന്റെ ആദ്യ യു.എന്‍ പ്രസംഗമാണിത്. യു.എസിന് ഇപ്പോള്‍ പുതിയ കണ്ണാണെന്ന് അദ്ദേഹം പറഞ്ഞു. അതുകൊണ്ടു തന്നെ സമാധാന പ്രവര്‍ത്തനത്തില്‍ ഇപ്പോള്‍ ഒരു വിശ്വസ്തനായ മധ്യസ്ഥന്‍ ഇല്ലെന്നും മഹ്മൂദ് അബ്ബാസ് ചൂണ്ടിക്കാണിച്ചു.

ഫലസ്തീന്‍ രാഷ്ട്രത്തെ കൂടുതല്‍ രാജ്യങ്ങള്‍ അംഗീകരിക്കണമെന്ന് പി.എല്‍.ഒ നേതാവുകൂടിയായ മഹ്മൂദ് അബ്ബാസ് യു.എന്‍ അംഗരാജ്യങ്ങളോട് അഭ്യര്‍ഥിച്ചു. ഇതിലൂടെ ഇസ്‌റാഈലിനു മേല്‍ യു.എന്‍ പാസാക്കിയ പ്രമേയങ്ങളെ ശക്തിപ്പെടുത്തണമെന്നും അദ്ദേഹം പറഞ്ഞു. 1949 മുതല്‍ യു.എന്നില്‍ പാസാക്കിയ 700 ല്‍ അധികം പ്രമേയത്തില്‍ ഒന്നുപോലും ഇസ്‌റാഈല്‍ നടപ്പിലാക്കിയിട്ടില്ലെന്നും അദ്ദേഹം ചൂണ്ടിക്കാണിച്ചു.