റിയാദ്: ജോലിയും ശമ്പളവുമില്ലാതെ ഒന്നര വർഷമായി ദുരിതം പേറി ജീവിക്കുന്ന മലയാളി അടക്കമുള്ള ഇന്ത്യക്കാർ കനിവിനായി കേഴുന്നു. കിഴക്കൻ സഊദിയിലെ സ്വകാര്യ സ്ഥാപനത്തിലെ ജീവനക്കാരായ മലയാളി ഉൾപ്പെടെയുള്ള നാല് ഇന്ത്യക്കാരാണ് എന്ത് ചെയ്യണമെന്നറിയാതെ ദുരിതം പേറി ദിനങ്ങൾ തള്ളി നീക്കുന്നത്.

താമസ രേഖ പോലുമില്ലാതെ അനധികൃതമായുള്ള താമസം മൂലം ഏറെ കഷ്ടത അനുഭവിക്കുന്ന ഇവർ സുമനസ്സുകളുടെ സഹായത്തോടെയാണ് ഇവിടെ പിടിച്ച് നിൽക്കുന്നത്. കിഴക്കൻ സഊദിയിലെ അൽഹസ ഹുഫൂഫിൽ  സ്‌പോണ്‍സര്‍ സ്ഥാപനം അടച്ചതോടെയാണ് കിടപ്പാടം പോലുമില്ലാതെ നാടണയാന്‍ കഴിയാതെ ഇവര്‍ ദുരിത ജീവിതം നയിക്കുന്നത്. വിഷയം എംബസിയിലെത്തിച്ച് ഉടന്‍ നാട്ടിലെത്തികാനുള്ള വഴി തേടുകയാണ് ദമാമിലെ സാമൂഹ്യ പ്രവര്‍ത്തകരിപ്പോള്‍. 

തൃശ്ശൂര്‍ ഇരിങ്ങാലക്കുട സ്വദേശി ജോര്‍ജ് തോമസും, രണ്ട് തമിഴ്‌നാട് സ്വദേശികളും ഒരു യു.പി സ്വദേശിയുമാണ് ഇവിടെ സഹായത്തിനായി കേഴുന്നത്. രണ്ട് വര്‍ഷത്തിലേറെയായി താമസ രേഖ പോലുമില്ലാതെ ഇവിടെ ദുരിതത്തില്‍ കഴിഞ ഇവർ കഴിഞ്ഞ വര്‍ഷം ശമ്പളം മുടങ്ങിയതോടെ ലേബര്‍ കോടതിയെ സമീപിച്ചെങ്കിലും സ്‌പോൺസർ സഹകരിക്കാത്തത്തത് വിനയായി. ലേബർ കോടതിയിൽ നിന്നും ഇവരെ നാട്ടിലേക്ക് കയറ്റി അയക്കാനാണ് വിധി വന്നത്. എന്നാൽ, കേസിൽ ഹാജരാകുകയോ തുടർ നടപടികളോ സ്വീകരിക്കാൻ തയ്യാറാകാതിരുന്ന സ്‌പോൺസർ തനിക്കെതിരെ കേസ് നൽകിയെന്ന കാരണത്താൽ താമസ സ്ഥലത്തെ വെള്ളവും വൈദ്യുതിയും സ്‌പോണ്‍സര്‍ വിഛേദിച്ചു കൂടുതൽ ദ്രോഹ പരമായ നടപടികളിലേക്ക് കടക്കുകയായിരുന്നു.