മലപ്പുറം: വിദ്യാഭ്യാസ രംഗത്തുള്ള ജില്ലയുടെ പുരോഗതിയും കുട്ടികളുടെ ഉന്നത പഠനനിലവാരവും സംസ്ഥാനത്തിന് മാതൃകയാണെന്ന് പി.കെ കുഞ്ഞാലിക്കുട്ടി പറഞ്ഞു. എസ്.എസ്.എല്‍.സി, പ്ലസ്ടു, വി.എച്ച്.എസ്.സി പരീക്ഷകളില്‍ എല്ലാ വിഷയങ്ങളിലും എ പ്ലസ് നേടിയ വിദ്യാര്‍ഥികളെ ആദരിക്കുന്ന ജില്ലാപഞ്ചായത്തിന്റെ പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
ഹയര്‍സെക്കന്‍ഡറി പരീക്ഷയില്‍ എല്ലാ വിഷയങ്ങളിലും എ പ്ലസ് നേടിയ വിദ്യാര്‍ഥികള്‍ക്ക് എം.ഐ ഷാനവാസ് എം.പി ഉപഹാരം നല്‍കി. മുഴുവന്‍ വിഷയങ്ങളിലും എ പ്ലസ് നേടിയ ആയിരത്തിലധികം വിദ്യാര്‍ഥികളും രക്ഷിതാക്കളും പരിപാടിയില്‍ പങ്കെടുത്തു.
പ്ലസ്ടു പരീക്ഷയില്‍ മുഴുവന്‍ മാര്‍ക്കും നേടിയ ഒന്‍പത് വിദ്യാര്‍ഥികളെയും പ്രത്യേകം ആദരിച്ചു. നൂറ് ശതമാനം വിജയം നേടിയ 50 സ്‌കൂളുകള്‍ക്കുള്ള ഉപഹാരവും പരിപാടിയില്‍ വിതരണം ചെയ്തു.
ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ അധ്യക്ഷനായി. ജില്ലാ കലക്ടര്‍ അമിത് മീണ സന്ദേശം നല്‍കി. ജില്ലാ പഞ്ചായത്ത് വൈസ് പ്രസിഡന്റ് സക്കീന പുല്‍പ്പാടന്‍, ഡി.എഫ്.ഒ ആടല്‍ അരശന്‍, അംഗങ്ങളായ ഉമ്മര്‍ അറക്കല്‍, വി. സുധാകരന്‍, ഹാജറുമ്മ, അനിത കിഷോര്‍, സലീം കുരുവമ്പലം, എ.കെ അബ്ദുറഹ്മാന്‍, വിജയഭേരി കോഡിനേറ്റര്‍ ടി. സലീം സംസാരിച്ചു.