മസ്‌കത്ത്: ഇറാന്റെ പ്രതികാര നടപടി ഭയന്ന് ബ്രിട്ടന്റെ എണ്ണക്കപ്പല്‍ പേര്‍ഷ്യന്‍ ഉള്‍ക്കടലില്‍ സഊദി തീരത്ത് ഒളിപ്പിച്ചതായി റിപ്പോര്‍ട്ട്. 10 ലക്ഷം ബാരല്‍ അസംസ്‌കൃത എണ്ണ വഹിക്കാനാവുന്ന ബ്രിട്ടീഷ് ഹെറിറ്റേജ് കപ്പല്‍ ഇറാഖിലെ ബസറയിലേക്ക് നീങ്ങുന്നതിനിടയിലാണ് ഇറാന്‍ തങ്ങളുടെ കപ്പല്‍ വിട്ടുതന്നില്ലെങ്കില്‍ ബ്രിട്ടീഷ് കപ്പലിനെ പിടികൂടുമെന്ന് മുന്നറിയിപ്പു നല്‍കിയത്. ഇതോടെ കപ്പല്‍ സഊദി തീരത്തേക്ക് തിരിച്ചുവിടുകയായിരുന്നു. ഇറാന്‍ തീരത്തോടു ചേര്‍ന്ന ഹൊര്‍മുസ് കടലിടുക്കിലൂടെയല്ലാതെ ഈ കപ്പലിന് പുറത്തുകടക്കാനാവില്ല.
നേരത്തെ സിറിയയിലേക്ക് എണ്ണ കൊണ്ടുപോവുകയാണെന്നാരോപിച്ച് ഇറാന്റെ ഗ്രേസ് 1 എണ്ണക്കപ്പല്‍ ജിബ്രാള്‍ട്ടറില്‍ വച്ച് ബ്രിട്ടീഷ് നാവികസേന പിടികൂടിയത് കവര്‍ച്ചയാണെന്ന് ഇറാന്‍ ആരോപിച്ചിരുന്നു.