തൃശൂര്‍: നടന്‍ കലാഭവന്‍ മണിയുടെ മരണകാരണം ഇതുവരെ വ്യക്തമായിട്ടില്ലെന്ന് പൊലിസ് മനുഷ്യാവകാശ കമ്മിഷനെ അറിയിച്ചു. ആത്മഹത്യയോ കൊലപാതകമോ, സ്വാഭാവിക മരണമോ എന്ന് സ്ഥിരീകരിക്കാനായിട്ടില്ലെന്നും മരണവുമായി ബന്ധപ്പെട്ട് മണിയുടെ ആറ് സുഹൃത്തുക്കളെ നുണ പരിശോധനയ്ക്ക് വിധേയമാക്കുമെന്നും പൊലിസ് മനുഷ്യാവകാശ കമ്മിഷനു സമര്‍പ്പിച്ച റിപ്പോര്‍ട്ടില്‍ പറയുന്നു.

സംഭവ ദിവസം മണിക്കൊപ്പമുണ്ടായിരുന്ന സുഹൃത്തുക്കളെയും സഹായികളെയുമാണ് നുണപരിശോധന നടത്തുന്നത്. മണിയുടെ ആന്തരികാവയവങ്ങള്‍ രാസപരിശോധനയ്ക്ക് അയച്ചെങ്കിലും കൂടുതല്‍ വിവരങ്ങള്‍ ലഭിച്ചില്ല.അന്വേഷണത്തിന്റെ പുതിയ റിപ്പോര്‍ട്ടുകള്‍ മനുഷ്യാവകാശ കമ്മിഷനു സമര്‍പ്പിക്കാമെന്നും പൊലിസ് അറിയിച്ചു. കേസ് സി.ബി.ഐക്ക് വിടാന്‍ സര്‍ക്കാര്‍ വിജ്ഞാപനം പുറപ്പെടുവിച്ച കാര്യവും പൊലിസ് കമ്മിഷനെ അറിയിച്ചിട്ടുണ്ട്.