ദമാം: ദമാമിൽ ആത്മഹത്യ ചെയ്ത ഭാസ്‌ക്കരൻ പിള്ളയുടെ മൃതദേഹം രണ്ടു മാസത്തിനു ശേഷം നിയമതടസ്സങ്ങൾ നീക്കി നാട്ടിലെത്തിച്ചു. നവയുഗം സാംസ്ക്കാരിക വേദി ജീവകാരുണ്യവിഭാഗത്തിന്റെ ശ്രമഫലമായാണ് മൃതദേഹം നാട്ടിലെത്തിയ്ക്കാൻ കഴിഞ്ഞത്. കൊല്ലം അഞ്ചൽ അയിലറ സ്വദേശി ഭാസ്കരൻ പിള്ള (48 വയസ്സ്) രണ്ടു മാസങ്ങൾക്ക് മുൻപാണ് ദമാമിലെ സൈഹാത്തിലുള്ള സ്വന്തം മുറിയിൽ വെച്ച് തൂങ്ങി മരിച്ചത്. സാമ്പത്തിക ബുദ്ധിമുട്ടുകളായിരുന്നു ആത്മഹത്യയ്ക്ക് കാരണം.

      തുടർന്ന് ബന്ധുക്കളും സുഹൃത്തുക്കളും മൃതദേഹം നാട്ടിലെത്തിയ്ക്കാനുള്ള ശ്രമം തുടങ്ങി. ചില സാമൂഹ്യപ്രവർത്തകർ ഇടപെട്ടെങ്കിലും, നിയമകുരുക്കുകൾ മൂലം മൃതദേഹം നാട്ടിലെത്തിയ്ക്കാനുള്ള ശ്രമങ്ങൾ പരാജയപ്പെട്ടു. പിന്നീട് ഒരാഴ്ച്ച മുമ്പ് ഭാസ്കര പിള്ളയുടെ സുഹൃത്തായ ബാബു അറിയിച്ചതനുസരിച്ച് നവയുഗം രക്ഷാധികാരി ഷാജി കേസ് ഏറ്റെടുക്കുകയായിരുന്നു. ഭാസ്കരപിള്ളയുടെ കുടുംബം മൃതദേഹവുമായി ബന്ധപ്പെട്ട നിയമനടപടികൾക്കായി ഷാജി മതിലകത്തിന്റെ പേരിൽ അനുമതിപത്രം അയച്ചു കൊടുത്തു. നാട്ടിൽ നിന്നും വനംമന്ത്രി കെ.രാജു, സിപിഐ നേതാക്കളായ കെ.ഇ.ഇസ്മായിൽ, സുപാൽ എന്നിവരും ബന്ധപ്പെട്ടിരുന്നു.

     ഷാജി മതിലകം വിവിധ വകുപ്പിലുള്ള സഊദി അധികാരികളുമായി ബന്ധപ്പെട്ട് ആവശ്യമായ രേഖകൾ സമർപ്പിക്കുകയും നിയമനടപടികൾ പൂർത്തിയാക്കി കഴിഞ്ഞ ദിവസവും ഇൻഡിഗോ എയർലൈൻസ് വിമാനത്തിൽ മൃതദേഹം നാട്ടിലേയ്ക്ക് അയക്കുകയുമായിരുന്നു. നാട്ടിൽ മൃതദേഹത്തിന്റെ സാംസ്ക്കാരികചടങ്ങുകൾ പൂർത്തിയാക്കിയതായി ബന്ധുക്കൾ അറിയിച്ചു. ഭാര്യയും രണ്ടു കുട്ടികളും അടങ്ങുന്നതാണ് ഭാസ്കരൻ പിള്ളയുടെ കുടുംബം.