വൈത്തിരി: വെള്ളപ്പൊക്കത്തെത്തുടര്‍ന്ന് കുടിലുകള്‍ തകര്‍ന്നതു പൊഴുതന പഞ്ചായത്തിലെ പെരിങ്കോട ആദിവാസി സമരഭൂമിയിലെ കുടുംബങ്ങളെ ദുരിതത്തിലാക്കി.
പെരിങ്കോട ഗ്രൗണ്ടിനോടു ചേര്‍ന്നുള്ള നാല് ഏക്കര്‍ മിച്ചഭൂമിയിലാണ് ആദിവാസി ക്ഷേമസമിതിയുടെ നേതൃത്വത്തില്‍ ഭൂസമരം. മിച്ചഭൂമിക്കടുത്തുകൂടിയാണ് പെരിങ്കോടപ്പുഴ ഒഴുകുന്നത്. ഓഗസ്റ്റില്‍ കനത്ത മഴയ്ക്കിടെ പുഴ കരകവിഞ്ഞ് നാലു തവണയാണ് സമരഭൂമിയില്‍ വെള്ളം കയറിയത്. സമരഭൂമിയിലേക്കുള്ള വഴിയുടെ അരികുകളും ഇടിഞ്ഞു. പ്ലാസ്റ്റിക്ക്ഷീറ്റും ടാര്‍പോളിനും മാറ്റും ഉപയോഗിച്ച് നിര്‍മിച്ചതാണ് സമരഭൂമിയിലെ കുടിലുകള്‍. ഇവ തകര്‍ന്നതോടെ കുടുംബവീടുകളിലേക്കും മറ്റും താമസം മാറ്റിയിരിക്കയാണ് സമരഭൂമിയിലുള്ളവര്‍.