പാലക്കാട്: ജീവഹാനി കൂടാതെയും മാലിന്യം ചവിട്ടാതെയും ഒറ്റപ്പാലം ബസ് സ്റ്റാന്റ് യാത്രാവശ്യങ്ങള്‍ക്കായി ഉപയോഗിക്കാന്‍ അന്തസുറ്റതും ആരോഗ്യകരവുമായ സാഹചര്യം ഉറപ്പാക്കണമെന്ന് സംസ്ഥാന മനുഷ്യാവകാശ കമ്മിഷന്‍. യാത്രക്കാര്‍ക്ക് ഭീഷണിയായ കുണ്ടും കുഴിയും മണ്‍കൂനകളും അതിവേഗം ഒഴിവാക്കണമെന്നും കമ്മിഷന്‍ ആവശ്യപ്പെട്ടു. ശുദ്ധമായ കുടിവെള്ളവും വൃത്തിയുള്ള ഇരിപ്പിടങ്ങളും ബസ് സ്റ്റാന്റില്‍ ഉറപ്പാക്കണമെന്നും കമ്മിഷനംഗം കെ. മോഹന്‍കുമാറിന്റേതാണ് ഉത്തരവ് ഇറക്കി.
പുതിയ സ്റ്റാന്റിന്റെ നിര്‍മാണം വൈകുമെങ്കില്‍ ശുദ്ധജലം, ശുചിമുറി എന്നിവ അതിവേഗം പ്രവര്‍ത്തനക്ഷമമാക്കാന്‍ താല്‍ക്കാലിക സംവിധാനം ഏര്‍പ്പെടുത്തണം. ഇക്കഴിഞ്ഞ ജൂണില്‍ പുതിയ ബസ് സ്റ്റാന്റിന്റെ നിര്‍മാണം പൂര്‍ത്തിയാവുമെന്നാണ് പാലക്കാട് ജില്ലാ കലക്ടര്‍ മാര്‍ച്ച് അഞ്ചിന് കമ്മിഷനെ അറിയിച്ചിരുന്നത്. ഇത് നടപ്പിലായില്ലെങ്കില്‍ താല്‍ക്കാലിക സംവിധാനം ഏര്‍പ്പെടുത്തുന്നത് സംബന്ധിച്ച് കമ്മിഷന്‍ നല്‍കിയ ഉത്തരവ് നഗരസഭാ കൗണ്‍സിലിന്റെ പരിഗണനക്ക് 15 ദിവസത്തിനകം നഗരസഭാ സെക്രട്ടറി എത്തിക്കണമെന്നും കമ്മിഷന്‍ ആവശ്യപ്പെട്ടു.
ബസ് സ്റ്റാന്റിന്റെ പുറകില്‍ നാലര ഏക്കര്‍ സ്ഥലത്ത് നിര്‍മിക്കുന്ന പുതിയ സ്റ്റാന്റിന്റെ പ്രവൃത്തി 95 ശതമാനം പുര്‍ത്തിയാക്കിയതായി പാലക്കാട് കലക്ടര്‍ കമ്മിഷനെ അറിയിച്ചു. അഞ്ച് കോടി രൂപ കൂടി അധിക വായ്പ എടുത്താണ് നിര്‍മാണം പൂര്‍ത്തിയാക്കുന്നത്. യാത്രക്കാരുടെ പ്രാഥമികാവശ്യങ്ങള്‍, ശുദ്ധജല ലഭ്യത എന്നിവയെക്കുറിച്ച് റിപ്പോര്‍ട്ടില്‍ പരാമര്‍ശിക്കാതിരുന്ന നഗരസഭയെ കമ്മിഷന്‍ ഉത്തരവില്‍ വിമര്‍ശിച്ചിട്ടുണ്ട്.
നഗരസഭക്ക് വരുമാനമില്ലാത്തതും അഞ്ച് കോടിയുടെ വായ്പ ലഭിക്കാന്‍ താമസിച്ചതും കരാറുകാരന്റെ വീഴ്ചയുമൊന്നും ജനങ്ങളുടെ പ്രാഥമികാവശ്യങ്ങള്‍ പരിഹരിക്കാന്‍ തടസമാകരുതെന്നും കമ്മിഷന്‍ ഉത്തരവില്‍ പറഞ്ഞു.