പേരാമ്പ്ര: തെരുവുനായ്ക്കള്‍ കൂട്ടത്തോടെയെത്തി കാല്‍നട യാത്രക്കാരെയും മൃഗങ്ങളെയും ഉപദ്രവിക്കുന്നതായി പരാതി. രാവിലെ നടക്കാന്‍ പോകുന്ന സ്ത്രീകളും പ്രായമുള്ളവരും പത്രവിതരണക്കാരും നായ്ക്കളുടെ ശല്യത്താല്‍ പ്രയാസപ്പെടുകയാണ്. ഒഴിഞ്ഞ പറമ്പുകളിലും  കടവരാന്തകളിലും കൂട്ടത്തോടെയാണ് ഇവ തമ്പടിക്കുന്നത്. മത്സ്യ മാംസ മാര്‍ക്കറ്റുകള്‍,ഇന്നര്‍ മാര്‍ക്കറ്റ്, ടി.ബി റോഡ് പരിസരം, ബസ് സ്റ്റാന്‍ഡ്, പഴയ എ.യു.പി സ്‌കൂള്‍ പരിസരം, ചെമ്പ്ര റോഡ് ഭാഗങ്ങള്‍ എന്നിവ നായകളുടെ വിഹാരകേന്ദ്രങ്ങളാണ്. സ്‌കൂള്‍ തുറക്കാന്‍ ദിവസങ്ങള്‍ മാത്രം ബാക്കിനില്‍ക്കെ നായകളുടെ ആക്രമണത്തെ ഭയന്ന് കുട്ടികളെ കൃത്യസമയത്ത് പറഞ്ഞയക്കാന്‍ രക്ഷിതാക്കള്‍ മടിക്കുമെന്ന ആശങ്കയിലാണ് വിദ്യാലയ അധികൃതര്‍.