പൊന്നാനി: സര്‍ക്കാര്‍ ഉത്തരവിന്റെ നൂലാമാലകളില്‍ വീടെന്ന സ്വപ്നം ബാക്കിയായ ജാനകിയമ്മയുടെ സ്വപ്നങ്ങള്‍ക്ക് പൊന്നാനി സ്‌കോളര്‍ കോളജിലെ പൂര്‍വ വിദ്യാര്‍ഥികളുടെ വാട്‌സ് ആപ് കൂട്ടായ്മയുടെ കൈത്താങ്ങ്. ജാനകിയമ്മയുടെ വീടിന്റെ നിര്‍മാണം കൂട്ടായ്മയുടെ നേതൃത്വത്തില്‍ നടക്കും. തിങ്കളാഴ്ച മുതല്‍ വീടിന്റെ നിര്‍മാണം ആരംഭിക്കാനാണ് തീരുമാനം.
കഴിഞ്ഞ 65 വര്‍ഷമായി ഓലക്കുടിലില്‍ ജീവിച്ച ജാനകിയമ്മയും കുടുംബത്തിനും ഇ.എം.എസ് ഭവന പദ്ധതി പ്രകാരം വീട് ലഭിച്ചിരുന്നു. വീട് നിര്‍മാണം ആരംഭിക്കുകയും ചെയ്തു. പക്ഷെ പണി പാതി വഴിയിലെത്തിയപ്പോഴാണ് വീട് വെക്കുന്ന സ്ഥലം പറമ്പല്ലെന്നും നഞ്ച ഭൂമിയാണെന്നും അവര്‍ ആധാരത്തില്‍നിന്ന് തിരിച്ചറിഞ്ഞത്. തനിക്ക് ഇനി സര്‍ക്കാര്‍ ഫണ്ട് ലഭിക്കാന്‍ സാധ്യത ഇല്ലെന്നും ജാനകിയമ്മ അറിഞ്ഞു. ഇതിനിടെയെത്തിയ പ്രളയത്തില്‍ വീട് പണിക്ക് ഇറക്കി വെച്ചിരുന്ന സിമന്റും മറ്റ് സാധനങ്ങളും ഉപയോഗ ശൂന്യമാവുകയും ചെയ്തതോടെ ഈ കുടുംബത്തിന്റെ സ്വപ്നങ്ങളെല്ലാം തകര്‍ന്നടിഞ്ഞു. ഇപ്പോള്‍ ഒറ്റമുറി ചായ്പിലാണ് കുടുംബത്തിന്റെ അന്തിയുറക്കം. നഗരസഭയില്‍ രണ്ടു വീടുകളാണ് സ്‌കോളര്‍ കോളജിലെ പൂര്‍വ വിദ്യാര്‍ഥികളും വിദ്യാര്‍ഥികളും അധ്യാപകരും മാനേജ്‌മെന്റും ചേര്‍ന്ന് നിര്‍മിച്ച് നല്‍കുന്നത്.