തൃശൂര്‍: ചികിത്സയിലിരിക്കെ കഴിഞ്ഞ ദിവസം അറസ്റ്റിലായ മാവോയിസ്റ്റ് നേതാവ് രാജനെ ചോദ്യം ചെയ്യാന്‍ പ്രത്യേക അന്വേഷണ സംഘത്തിന് അനുമതി.

ചികിത്സയ്‌ക്കൊപ്പം ചോദ്യം ചെയ്യലിനുള്ള അനുമതിയാണ് മഞ്ചേരി ജില്ലാ കോടതി നല്‍കിയത്. കോഴിക്കോട് മെഡിക്കല്‍ കോളജില്‍ പ്രത്യേക സെല്ലിലാണ് രാജനെ പ്രവേശിപ്പിച്ചിരിക്കുന്നത്. 2016, 17 കാലത്ത് സര്‍ക്കാരിന് എതിരെ സായുധ പോരാട്ടം നടത്താന്‍ യോഗം ചേര്‍ന്നതിനാണ് ഇയാള്‍ക്കെതിരേ കേസ് ഉള്ളത്. പശ്ചിമഘട്ട ദളത്തിന്റെ നേതാവായ ഇയാള്‍ 16 വര്‍ഷമായി ഒളിവിലായിരുന്നു.  കുപ്പുരാജിനൊപ്പം മലപ്പുറം എടക്കരയില്‍ മാവോവാദി അനുകൂല പ്രവര്‍ത്തനത്തിലായിരുന്നു രാജന്‍. 

ഒല്ലൂര്‍ ആനക്കല്ലില്‍ സഹോദരിയുടെ വീട്ടിലേക്കു പോകുന്നതിനിടെ കഴിഞ്ഞ ദിവസം ഒല്ലൂരിലുണ്ടായ വാഹനാപകടത്തില്‍ പരുക്കേറ്റാണ് രാജനെ കൂര്‍ക്കഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചത്. തൃശൂരില്‍ രാജനെ അറസ്റ്റ് ചെയ്യാനെത്തിയ അന്വേഷണ സംഘം ഒല്ലൂരില്‍ സഹോദരിയുടെ വീട്ടിലും പരിശോധന നടത്തിയിരുന്നു. ഇതിനിടെ ആശുപത്രിയില്‍ രാജന്റെ കൂടെയുണ്ടായിരുന്ന സഹോദരിയുടെ മകനെ കാണാനില്ലെന്ന് ആക്ഷേപം ഉയര്‍ന്നിട്ടുണ്ട്.