വണ്ടൂര്‍: വണ്ടൂര്‍ ബ്ലോക്ക് പഞ്ചായത്ത് 2017-18 വാര്‍ഷിക പദ്ധതി ഭരണസമിതി യോഗം അംഗീകരിച്ചു. പ്രതിപക്ഷ അംഗങ്ങളുടെ വിയോജനകുറിപ്പോടെയാണ് അന്തിമപദ്ധതിക്ക് യോഗം അംഗീകാരം നല്‍കിയത്. സംഘര്‍ഷ സാധ്യത കണക്കിലെടുത്ത് പൊലിസ് സംരക്ഷണത്തിലായിരുന്നു യോഗം.
6,25,24,000 രൂപ അടങ്കല്‍ വരുന്ന അന്തിമ പദ്ധതിക്കാണ് വ്യാഴാഴ്ച ചേര്‍ന്ന ഭരണസമിതി യോഗം അംഗീകാരം നല്‍കിയത്. സര്‍ക്കാര്‍ നിര്‍ദേശങ്ങള്‍ പാലിച്ച് ഭവന നിര്‍മാണം, ആരോഗ്യം, കുടിവെള്ളം, കാര്‍ഷിക മേഖല എന്നിവക്ക് പ്രാമുഖ്യം നല്‍കുന്നതാണ് പദ്ധതിയെന്ന് ബ്ലോക്ക് പഞ്ചായത്ത് പ്രസിഡന്റ് കെ.ടി ജുവൈരിയ പറഞ്ഞു. അതേസമയം 15 അംഗ ഭരണ സമിതിയില്‍ സി.പി.എമ്മിന്റെ അഞ്ചുഅംഗങ്ങളും വിയോജനം രേഖപ്പെടുത്തി. കരട് പദ്ധതി ചര്‍ച്ച ചെയ്ത് അംഗീകരിക്കാന്‍  17ന് ചേര്‍ന്നിരുന്ന വികസന സെമിനാര്‍ കൈയാങ്കളിയില്‍ കലാശിച്ചിരുന്നു.
പൊതുഫണ്ട്, ഉത്പാദന മേഖല, സേവന മേഖല എന്നിവയില്‍ പ്രതിപക്ഷ അംഗങ്ങളുടെ ഡിവിഷനുകളെ പൂര്‍ണമായി അവഗണിച്ചുവെന്നും ഇത് തിരുത്തണമെന്നും ആവിശ്യപ്പെട്ടാണ് അന്ന് പ്രതിപക്ഷ അംഗങ്ങളുടെ നേതൃത്വത്തില്‍ പ്രതിഷേധം തുടങ്ങിയത്. വ്യാഴാഴ്ച്ച ചേര്‍ന്ന ഭരണസമിതി യോഗത്തിലും സി.പി.എം അംഗംങ്ങള്‍ ഇതേ നിലപാടില്‍ ഉറച്ചുനിന്നു. എന്നാല്‍ പ്രതിപക്ഷ അംഗങ്ങളുടെ ആവശ്യം അംഗീകരിക്കാതെ ഭരണസമിതി യോഗം അന്തിമ പദ്ധതിക്ക് അംഗീകാരം നല്‍കുകയായിരുന്നു. ഇതോടെ തീരുമാനത്തിനെതിരേ പ്രതിപക്ഷം വിയോജനക്കുറിപ്പ് രേഖപ്പെടുത്തി. യോഗം റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരെ ഹാളില്‍ പ്രവേശിപ്പിക്കാത്തത് പ്രതിഷേധത്തിനിടയാക്കി.