കൊണ്ടോട്ടി: അനേകം മതങ്ങളുടേയും സംസ്‌കാരങ്ങളുടേയും സംഗമസ്ഥാനമായ ഭാരതത്തിന്റെ പൈതൃകത്തിന് പോറലേല്‍പ്പിക്കുന്ന, ഭരണഘടന ഉറപ്പ് നല്‍കിയ മതസ്വാതന്ത്ര്യത്തില്‍ ഇടപെടുന്ന കോടതി വിധി ആശങ്കാജനകമാണെന്ന് സുന്നി യുവജന സംഘം സംസ്ഥാന കമ്മിറ്റി അഭിപ്രായപ്പെട്ടു.
മതകാര്യങ്ങള്‍ തീരുമാനിക്കേണ്ടതും ആചാരാനുഷ്ഠാനങ്ങളില്‍ വിധി പറയേണ്ടതും മതപണ്ഡിതന്‍മാരാണ്. വിശ്വാസപരമായ കാര്യങ്ങള്‍ തികച്ചും സ്വകാര്യമാണെന്നിരിക്കേ ജുഡീഷ്യറിക്കോ ഗവണ്‍മെന്റിനോ ഇക്കാര്യത്തില്‍ ഇടപെടാന്‍ അധികാരമില്ല.
ഭരണഘടന ഉറപ്പു നല്‍കുന്ന വിശ്വാസ സ്വാതന്ത്ര്യത്തിന്റെ ലംഘനമാണിത്. ഇത്തരം കാര്യങ്ങളില്‍ കേവലം യുക്തിയെ ആധാരമാക്കി വിധി പറയുന്നത് ദൂരവ്യാപകമായ പ്രത്യാഘാതങ്ങളുണ്ടാക്കുമെന്നും എസ്.വൈ.എസ് എക്‌സിക്യൂട്ടീവ് ക്യാംപ് അംഗീകരിച്ച പ്രമേയത്തില്‍ ചൂണ്ടിക്കാട്ടി. സമസ്ത കേരള ജംഇയ്യത്തുല്‍ ഉലമ ഉപാധ്യക്ഷനായിരുന്ന ചെമ്പരിക്ക ഖാസി സി.എം അബ്ദുല്ല മൗലവിയുടെ ആസൂത്രിത കൊലപാതകം ആത്മഹത്യയായി സ്ഥാപിച്ച് ലോക്കല്‍ പോലിസ് തയാറാക്കിയ റിപ്പോര്‍ട്ട് അതേപടി ഉദ്ധരിച്ച് വീണ്ടും കോടതിയില്‍ സമര്‍പ്പിച്ച സി.ബി.ഐ നടപടി അങ്ങേയറ്റം പ്രതിഷേധാര്‍ഹമാണ്.
നേരത്തേ സി.ബി.ഐ നല്‍കിയ റിപ്പോര്‍ട്ട് തള്ളിക്കളയാന്‍ കോടതി കണ്ടെത്തിയ കാര്യങ്ങളിലൊന്നും പുതിയ റിപ്പോര്‍ട്ട് വിശദീകരണം നല്‍കുന്നില്ല. ഇത് കാര്യങ്ങളെ കൂടുതല്‍ സംശയത്തിന്റെ നിഴലിലാക്കുകയാണ് ചെയ്യുന്നത്. അതിനാല്‍ സി.ബി.ഐ യുടെ മറ്റൊരു സംഘത്തെക്കൊണ്ട് കേസ് അന്വേഷിപ്പിക്കാന്‍ നടപടി സ്വീകരിക്കണമെന്ന് ക്യാംപ് ആവശ്യപ്പെട്ടു.
ഇസ്‌ലാമില്‍ പള്ളികള്‍ക്ക് സ്ഥാനമില്ലെന്നും അവിഭാജ്യ ഘടകമല്ലെന്നുമുള്ള കോടതി വിധി ഇസ്‌ലാമിക പ്രമാണങ്ങളില്‍ കേവല ധാരണ പോലുമില്ലാത്തതാണെന്ന് വിലയിരുത്താന്‍ കാരണമായതായി യോഗം അംഗീകരിച്ച മറ്റൊരു പ്രമേയത്തില്‍ പറഞ്ഞു. ഇത്തരം വിധികള്‍ നീതിന്യായ വ്യവസ്ഥിയുടെ അന്തസിനെ പോലും ചെറുതാക്കാനാണ് പലപ്പോഴും കാരണമാകുക.
പള്ളികളോട് ഇതര മതസ്ഥര്‍ക്ക് പോലും മതിപ്പ് നഷ്ടപ്പെടുത്തുന്ന വിധം കുഴപ്പമുണ്ടാക്കുന്ന ശക്തികള്‍ അത്തരം തരംതാഴ്ന്ന പ്രവര്‍ത്തനങ്ങളില്‍നിന്ന് വിട്ടുനില്‍ക്കണമെന്നും ആരാധനാലയങ്ങളുടെ മഹത്വം മാനിക്കാന്‍ തയാറാവണമെന്നും യോഗം ആവശ്യപ്പെട്ടു.
പള്ളി മദ്‌സകള്‍ക്ക് കൃത്രിമ രേഖയുണ്ടാക്കി വാഖിഫിന്റെ ലക്ഷ്യങ്ങള്‍ക്കെതിരായ നിലപാട് സ്വീകരിക്കുന്നവര്‍ ഇസ്‌ലാമിക ശരീഅത്തിനെയാണ് വെല്ലുവിളിക്കുന്നതെന്നും ക്യാംപ് ഓര്‍മിപ്പിച്ചു. സയ്യിദ് മുഹമ്മദ് കോയ തങ്ങള്‍, പിണങ്ങോട് അബൂബക്കര്‍, ഹമീദ് ഫൈസി അമ്പലക്കടവ്, മുസ്തഫ മുണ്ടുപാറ, ഹംസ റഹ്മാനി കൊണ്ടിപ്പറമ്പ്, സലിം എടക്കര, ടി.കെ മുഹമ്മദ് കുട്ടി ഫൈസി പ്രസംഗിച്ചു.