കോഴിക്കോട്: ഓരോ മേഖലയിലും മികവിന്റെ കേന്ദ്രങ്ങളായി തെരഞ്ഞെടുക്കപ്പെട്ട അല്‍ബിര്‍റ് പ്രീ പ്രൈമറി സ്‌കൂളുകള്‍ക്കുള്ള കോട്ടുമല ബാപ്പു മുസ്‌ലിയാര്‍ സ്മാരക അവാര്‍ഡുകള്‍ പ്രഖ്യാപിച്ചു. അല്‍ബിര്‍റ് ചെയര്‍മാന്‍ സയ്യിദ് മുഹമ്മദ് കോയ തങ്ങള്‍ ജമലുല്ലൈലിയാണ് അവാര്‍ഡുകള്‍ പ്രഖ്യാപിച്ചത്.
ആദ്യ ബാച്ച് പുറത്തിറങ്ങിയ ശേഷം പ്രസ്തുത കാലയളവില്‍ സ്ഥാപനത്തിന്റെ പ്രവര്‍ത്തനം വിലയിരുത്തിയാണ് പുരസ്‌കാര ജേതാക്കളെ കണ്ടെത്തിയത്.
കാടങ്കോട് എജ്യൂക്കേഷന്‍ ട്രസ്റ്റ് ചെറുവത്തൂര്‍ (കാസര്‍കോട്), ഖുവ്വത്തുല്‍ ഇസ്‌ലാം കമ്പില്‍ (കണ്ണൂര്‍), ദാറുല്‍ അസ്ഹര്‍ കൊടുവള്ളി (കോഴിക്കോട്), ഇസ്സതുല്‍ ഇസ്‌ലാം ചിനക്കല്‍ (മലപ്പുറം), ഹിദായത്തുസ്വിബിയാന്‍ പൂവത്താണി (പാലക്കാട്), എ ആന്‍ഡ് കെ മെമ്മോറിയല്‍ പെരിങ്ങാല ആലുവ (എറണാകുളം) എന്നീ സ്ഥാപനങ്ങള്‍ ഒന്നാം സ്ഥാനം നേടി. അല്‍അമീന്‍ ചാരിറ്റബിള്‍ ട്രസ്റ്റ് എടച്ചാക്കൈ, മുസ്‌ലിം ജമാഅത്ത് അല്‍ബിര്‍റ് ചിറ്റാരിപ്പറമ്പ്, ശംസുല്‍ ഉലമാ ഇസ്‌ലാമിക് സെന്റര്‍ പാറക്കടവ്, ദവാഉല്‍ ഇസ്‌ലാം വേങ്ങര, ഹയാത്തുല്‍ ഇസ്‌ലാം കരിമ്പ എന്നീ സ്ഥാപനങ്ങള്‍ രണ്ടാം സ്ഥാനം നേടി.
സ്ഥാപനങ്ങള്‍ക്കുള്ള പുരസ്‌കാരങ്ങള്‍ നാളെ കോഴിക്കോട് സുപ്രഭാതം ഓഡിറ്റോറിയത്തില്‍ നടക്കുന്ന ചടങ്ങില്‍ സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ സമ്മാനിക്കും. മേഖലാതല അല്‍ബിര്‍റ് ഫെസ്റ്റ് നടത്തിയ സ്ഥാപനങ്ങള്‍, ജില്ലാ കോഡിനേറ്റര്‍മാര്‍ എന്നിവര്‍ക്കുള്ള മെമന്റോയും സമ്മാനിക്കും. ചടങ്ങില്‍ സയ്യിദ് മുഹമ്മദ് കോയ തങ്ങള്‍ ജമലുല്ലൈലി, എം.ടി അബ്ദുല്ല മുസ്‌ലിയാര്‍, ഉമര്‍ ഫൈസി മുക്കം, അബ്ദുസ്സമദ് പൂക്കോട്ടൂര്‍, നൗഷാദ് ബാഖവി ചിറയിന്‍കീഴ്, നാസര്‍ ഫൈസി കൂടത്തായ്, ആര്‍.വി കുട്ടിഹസന്‍ ദാരിമി, മുസ്തഫ മുണ്ടുപാറ, കെ. മോയിന്‍കുട്ടി മാസ്റ്റര്‍ പങ്കെടുക്കും.