കോഴിക്കോട്: വില്‍പനയ്ക്കായി കൊണ്ടുവന്ന 175 സ്പാസ്‌മോ പ്രോക്‌സിവോണ്‍ ലഹരി ഗുളികകളുമായി യുവാവ് പിടിയില്‍. നടക്കാവ് കുന്നുമ്മല്‍ സ്വദേശി ജിഷാദി (33) നെയാണ് കോഴിക്കോട് ടൗണ്‍ സി.ഐ ഉമേഷിന്റെ നിര്‍ദേശപ്രകാരം ടൗണ്‍ പൊലിസും ജില്ലാ ആന്റി നാര്‍കോട്ടിക് സ്‌പെഷല്‍ ആക്ഷന്‍ ഫോഴ്‌സും പിടികൂടിയത്. ടാഗോര്‍ ഹാളിനു സമീപത്തെ വാഹന പരിശോധനയ്ക്കിടെയാണ് ഇയാള്‍ പിടിയിലായത്.
പരിശോധനയ്ക്കായി വാഹനം നിര്‍ത്താന്‍ നിര്‍ദേശം നല്‍കിയ പൊലിസിനെ കണ്ട് ബൈക്ക് വെട്ടിച്ച് കടന്നുകളയാന്‍ ശ്രമിച്ച ജിഷാദിനെ പിന്തുടര്‍ന്ന് പിടികൂടുകയായിരുന്നു. പരിശോധനയില്‍ വില്‍പനയ്ക്കായി കൊണ്ടുവന്ന നിരോധിത 175 സ്പാസ്‌മോ പ്രോക്‌സി വോണ്‍ കാപ്‌സ്യൂളുകള്‍ പിടികൂടി. ഈ ക്യാപ്‌സൂള്‍ നിരോധിച്ചതു മുതല്‍ പിടിയിലാകുന്ന അഞ്ചാമത്തെ വ്യക്തിയാണ് ബാങ്ക് ജീവനക്കാരനായ ജിഷാദ് എന്നു പൊലിസ് പറഞ്ഞു. കുറച്ചുകാലങ്ങളായി ഈ ഗുളിക ഉപയോഗിച്ചുവരുന്ന ജിഷാദ് തനിക്ക് ലഹരി ഉപയോഗിക്കാന്‍ ആവശ്യമായ പണം കണ്ടെത്തുന്നതിനും അമിതമായ ആദായത്തിനുമാണ് ലഹരിവില്‍പനയിലേക്ക് കടന്നതെന്നും പൊലിസ് പറഞ്ഞു. കഴിഞ്ഞമാസം ഇത്തരം 2,640 ലഹരി ഗുളികകളുമായി ഗോവിന്ദപുരം സ്വദേശിയെ നടക്കാവ് പൊലിസും 2,000 ഗുളികകളുമായി കുറ്റിച്ചിറ സ്വദേശിയായ യുവാവിനെയും അരീക്കാട് സ്വദേശിയായ യുവാവിനെയും കുന്ദമംഗലം പൊലിസും പിടികൂടിയിരുന്നു.
ടൗണ്‍ എസ്.ഐ സുഭാഷ് ചന്ദ്രന്റെ നേതൃത്വത്തില്‍ ടൗണ്‍ പൊലിസ് സ്റ്റേഷനിലെ ഷാജി, പ്രജീഷ്, രതീഷ് കോഴിക്കോട്, നോര്‍ത്ത് അസി. കമ്മിഷണര്‍ പ്രിഥ്വിരാജിന്റെ നേതൃത്വത്തിലുള്ള ഡന്‍സാഫ് സ്‌ക്വാഡ് അംഗങ്ങളായ എ.എസ്.ഐ അബ്ദുല്‍ മുനീര്‍, എം. മുഹമ്മദ് ഷാഫി, എം. സജി, കെ. അഖിലേഷ്, കെ. രാജീവ്, കെ.എ ജോമോന്‍, എന്‍. നവീന്‍, കെ. രജിത്ത്ചന്ദ്രന്‍, എം. ജിനേഷ്, എ.വി സുമേഷ്, പി. സോജി, കെ. രതീഷ് എന്നിവരടങ്ങിയ സംഘമാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.