കൂത്തുപറമ്പ്: ഒഴിവു ദിവസം ലേഡീസ് ടെയ്‌ലറിങ് ഷോപ്പില്‍ മോഷണം. ഇരുപതിനായിരത്തോളം രൂപയുടെ വസ്ത്രങ്ങള്‍ കവര്‍ന്നു. കൂത്തുപറമ്പ് സഹകരണാശുപത്രിക്ക് എതിര്‍വശത്തെ ആഷീസ് ബോട്ടിക് എന്ന സ്ഥാപനത്തില്‍ നിന്നാണ് തയിച്ചു വച്ച ചുരീദാര്‍, ഗൗണ്‍ തുടങ്ങിയ വസ്ത്രങ്ങള്‍ മോഷ്ടിച്ചത്. ഞായറാഴ്ച ഉച്ചയ്ക്കാണ് സംഭവം. സ്ഥാപനത്തിന്റെ പിറക് വശത്തെ വാതില്‍ തകര്‍ത്താണ് മോഷ്ടാവ് അകത്തു കടന്നത്. ഒഴിവു ദിവസമായതിനാല്‍ സ്ഥാപനം തുറന്നിരുന്നില്ല. മധ്യവയസ്‌കയായ സ്ത്രീ സ്ഥാപനത്തിനകത്തു നിന്നും വസ്ത്രങ്ങള്‍ എടുത്തു കൊണ്ടു പോകുന്ന ദൃശ്യം സി.സി.ടി.വി കാമറയില്‍ പതിഞ്ഞിട്ടുണ്ട്. ഉടമ എം. ഷാനിബയുടെ പരാതിയില്‍ കൂത്തുപറമ്പ് പൊലിസ് സ്ഥലത്തെത്തി പരിശോധന നടത്തി.