മട്ടന്നൂര്‍: കണ്ണൂര്‍ വിമാനത്താവള സുരക്ഷാ ചുമതലയുള്ള സി.ഐ.എസ്.എഫ് ഉദ്യോഗസ്ഥരുടെ ആദ്യസംഘമെത്തി.
ഒന്നാംഘട്ടത്തില്‍ നിയോഗിച്ച 50 സേനാംഗങ്ങളാണ് ഇന്നലെ വൈകിട്ടോടെ വിമാനത്താവളത്തിലെത്തിയത്. ബാക്കിയുള്ളവര്‍ ഈമാസം തന്നെ എത്തും. രാജ്യത്തെ വിവിധ വിമാനത്താവളങ്ങളില്‍ നിയോഗിക്കപ്പെട്ടവരാണ് കണ്ണൂരില്‍ എത്തിയത്. ഇപ്പോള്‍ ചുമതലയേല്‍ക്കുന്ന 50 പേരെ മൂന്നു ഏരിയയിലാണ് വിന്യസിക്കുന്നത്.
ടെര്‍മിനല്‍, ഏപ്രണ്‍, റണ്‍വേ, എന്നിവയ്ക്കു പുറമെ വിമാനത്താവള പ്രവേശന കവാടത്തിനും സേന നിലയുറപ്പിക്കും.
എമിഗ്രേഷന്‍ വിഭാഗത്തിലും കസ്റ്റംസിലും പദ്ധതി പ്രദേശത്തും മറ്റു വിവിധ ഭാഗങ്ങളിലുമായാണു സി.ഐ.എസ്.എഫുകാരെ നിയമിക്കാന്‍ തീരുമാനമായത്. 613 സി.ഐ.എസ്.എഫുകാരെയാണു വിമാനത്താവളത്തില്‍ നിയോഗിക്കുക. കമന്‍ഡന്‍ഡ് എം.ജെ ധന്‍രാജ് ഡാനിയേലിന്റെ നേതൃത്വത്തിലുള്ള സംഘമാണ് എത്തിയത്.