നിലമ്പൂര്‍: ഡിജിറ്റല്‍ സിഗ്‌നേച്ചര്‍ ലഭ്യമാകാത്തതിനെ തുടര്‍ന്ന് എയ്ഡഡ് സ്ഥാപനങ്ങളുടെ ജൂണ്‍ മാസത്തെ ബില്‍ ട്രഷറികളില്‍ കെട്ടിക്കിടക്കുന്നു.
ട്രഷറികളില്‍ സമര്‍പ്പിച്ച മാറാനാകാത്ത ബില്ലുകള്‍ ഡിജിറ്റല്‍ സിഗ്‌നേച്ചറോടു കൂടി വീണ്ടും സ്പാര്‍ക്കില്‍ തയാറാക്കി സമര്‍പ്പിക്കാനാണ് നിര്‍ദേശം.
എയ്ഡഡ് സ്ഥാപനങ്ങളുടെ ശമ്പള ബില്ലുകളില്‍ സ്‌കൂളുകളുടേത് എ.ഇ.ഒമാരും, കോളജുകളിലേത് ഡെപ്യൂട്ടി ഡയരക്ടര്‍മാരും കൗണ്ടര്‍ സൈന്‍ ചെയ്തശേഷമാണ് ട്രഷറികളിലെത്തിക്കുക.
ഇതുപ്രകാരം ഓരോ മാസവും അവസാനം സ്ഥാപനങ്ങള്‍ സ്പാര്‍ക്കില്‍ ബില്ലുകള്‍ തയാറാക്കി അതത് ഡെപ്യൂട്ടി ഡയരക്ടര്‍മാരുടെ ഓഫിസിലേക്ക് പരിശോധനക്കായി എത്തിക്കും. പരിശോധന പൂര്‍ത്തിയാക്കി ഇവ തിരിച്ചെത്തുമ്പോഴേക്കും 10ാം തിയതി കഴിയും. ഇത്തരത്തില്‍ ജൂണില്‍ ബില്ലുകള്‍ പരിശോധനക്ക് മേല്‍ ഓഫിസുകളില്‍ സമര്‍പ്പിച്ച സ്ഥാപനങ്ങളാണ് വെട്ടിലായത്. ബില്ലുകള്‍ റദ്ദാക്കി ഡിജിറ്റല്‍ സിഗ്‌നേച്ചറോടുകൂടി വീണ്ടും ട്രഷറികളില്‍ സമര്‍പ്പിക്കാനാണ് നിര്‍ദേശം.
സ്പാര്‍ക്കില്‍ തയാറാക്കിയ ബില്ലുകള്‍ വീണ്ടും ഡെപ്യൂട്ടി ഡയരക്ടര്‍മാരുടെ കാര്യാലയങ്ങളില്‍ എത്തിച്ച് കൗണ്ടര്‍ സൈന്‍ ചെയ്യേണ്ടിയും വരും. ജൂണ്‍ മാസത്തെ ശമ്പളം വൈകുന്നതോടെ ജൂലൈ മാസത്തെ ബില്ലിനെയും ബാധിക്കും.
ജൂലൈ 10 മുതല്‍ ട്രഷറികളില്‍ സമര്‍പ്പിക്കുന്ന ശമ്പള ബില്ലുകള്‍ക്ക് ഡിജിറ്റല്‍ സിഗ്‌നേച്ചര്‍ നിര്‍ബന്ധമാണെന്ന് കാണിച്ച് ജൂണ്‍ 24നാണ് സംസ്ഥാന ധനകാര്യവകുപ്പ് നിര്‍ദേശം നല്‍കിയിരുന്നത്.
അപ്പോഴേക്കും സ്പാര്‍ക്കില്‍ തയാറാക്കിയ ജൂണ്‍ മാസത്തെ ശമ്പള ബില്ലുകള്‍ കൗണ്ടര്‍ സൈന്‍ ചെയ്യുന്നതിനായി സ്ഥാപനങ്ങള്‍ ഡെപ്യൂട്ടി ഡയരക്ടര്‍മാരുടെ ഓഫിസുകളിലേക്ക് സമര്‍പ്പിക്കുകയും ചെയ്തു. ജില്ലാ ട്രഷറികള്‍ വഴി അപേക്ഷ നല്‍കിയാല്‍ സൗജന്യമായി ഡിജിറ്റല്‍ സിഗ്‌നേച്ചര്‍ ലഭിക്കുമെന്നും അറിയിപ്പുണ്ടായതിനെത്തുടര്‍ന്ന് ജില്ലാ ട്രഷറികളില്‍ അപേക്ഷ നല്‍കിയവര്‍ക്ക് ഇതുവരെയും ഇവ ലഭിച്ചിട്ടില്ല.
അതേസമയം ചിലര്‍ സ്വകാര്യ ഏജന്‍സികളെ ഏല്‍പ്പിച്ചതിനാല്‍ ഒരു ദിവസം കൊണ്ട് തന്നെ ഡിജിറ്റല്‍ സിഗ്‌നേച്ചര്‍ ലഭിക്കുകയും ചെയ്തിട്ടുണ്ട്.
വന്‍തുക ഈടാക്കിയാണ് ചില സ്വകാര്യ ഏജന്‍സികള്‍ ഡിജിറ്റല്‍ സിഗ്‌നേച്ചര്‍ എടുത്തുകൊടുക്കുന്നതെന്നും ആക്ഷേപമുണ്ട്.
ഇതിനെ പ്രതിരോധിക്കാനാണ് സര്‍ക്കാര്‍ തന്നെ ട്രഷറികള്‍ മുഖേന ഡിജിറ്റല്‍ സിഗ്‌നേച്ചര്‍ എടുക്കാന്‍ അവസരമൊരുക്കിയത്.