മണ്ണഞ്ചേരി: മദ്യപിച്ചെത്തിയവര്‍ ബഹളമുണ്ടാക്കുന്നുവെന്ന വിവരം ലഭിച്ചാണ് പോലിസ് സ്ഥലത്തെത്തിയത്. എന്നാല്‍, പോലിസ് അറസ്റ്റ് ചെയ്തതാവാട്ടെ അടുത്തി വീട്ടിലെ സൈനികനെയും. അറസ്റ്റില്‍ പ്രതിഷേധിച്ച് പോലിസ് ജീപ്പ് തടഞ്ഞതിനെ തുടര്‍ന്ന് 14 പേര്‍ക്കെതിരേ കേസെടുക്കുകയും ചെയ്തു. മണ്ണഞ്ചേരി 13ാം വാര്‍ഡ് മറ്റത്തില്‍വെളി കോളനിയില്‍ എ.ബിബിനെ(26)യാണ് പോലിസ് അറസ്റ്റ് ചെയ്തത്. ബഹളത്തിനിടയില്‍ ബിബിന്റെ മുത്തശ്ശിക്കും പരിക്കേറ്റു.

ബിബിന്റെ വീടിനു സമീപത്ത് മദ്യപസംഘം ചേരിതിരഞ്ഞ് ബഹളമുണ്ടക്കുന്നുവെന്ന പരാതി ലഭിച്ചാണ് പോലിസ് സ്ഥലത്തെത്തിയത്. പോലിസെത്തിയപ്പോഴേക്കും മദ്യപര്‍ സ്ഥലംവിട്ടിരുന്നു. മദ്യപസംഘം പിരിഞ്ഞുപോയെന്ന് പറഞ്ഞ് പോലിസും ബിബിനും തമ്മില്‍ തര്‍ക്കമുണ്ടായി. തുടര്‍ന്ന് ബിബിനെ പിടികൂടി ജീപ്പില്‍ കയറ്റുമ്പോള്‍ യുവാക്കള്‍ വന്നു തടയുകയായിരുന്നു. കൃത്യനിര്‍വഹണം നടത്തിയതിനും ജീപ്പ് നശിപ്പിച്ചതിനുമാണ് സൈനികനെതിരേ കേസെടുത്തത്.

പോലിസെത്തിയപ്പോള്‍ വീടിനു മുമ്പില്‍ നിന്ന ബിബിനെ പോലിസ് അസഭ്യം പറഞ്ഞത് ചോദ്യം ചെയ്തതിനാണ് ബിബിനെ അറസ്റ്റ് ചെയ്തതെന്ന് നാട്ടുകാര്‍ പറഞ്ഞു.