മാനന്തവാടി: ബാങ്കില്‍ നിന്ന് പണം തിരിമറി നടത്തിയ കേസില്‍ കാഷ്യറെ പൊലിസ് കസ്റ്റഡിയിലെടുത്തു.
പഞ്ചാബ് നാഷണല്‍ ബാങ്ക് മാനന്തവാടി ശാഖയിലെ ജീവനക്കാരനായ മലപ്പുറം വണ്ടൂര്‍ എലവന്‍പറമ്പന്‍ സെഹീറാ(42)ണ് കസ്റ്റഡിയിലുള്ളത്. 13 വര്‍ഷമായി ഈ ബാങ്കില്‍ ജോലി ചെയ്തുവരുന്ന ഇയാള്‍ നാല് വര്‍ഷം മുമ്പാണ് കാഷ്യര്‍ ആയി ജോലി ചെയ്യാന്‍ തുടങ്ങിയത്. വ്യഴാഴ്ച ബാങ്കിന്റെ ഹെഡ് ഓഫിസിലേക്ക് ഭീമമായ സംഖ്യ ട്രാന്‍സ്ഫര്‍ ചെയ്യാന്‍ ആവശ്യപ്പെട്ടിരുന്നു.
ഇത് ചെയ്യാതിരുന്നതോടെ മാനേജര്‍ നടത്തിയ അന്വേഷണത്തില്‍ പണമില്ലെന്ന് കണ്ടെത്തിയതോടെയാണ് സംഭവം പുറത്തായത്. പൊലിസ് നടത്തിയ പ്രാഥമിക അന്വേഷണത്തില്‍ 51 ലക്ഷം രൂപ നഷ്ടമായതായി കണ്ടെത്തിയിട്ടുണ്ട്. സംഭവത്തില്‍ കൂടുതല്‍ പേര്‍ക്ക് പങ്കുണ്ടോയെന്നും ഏത് രീതിയിലാണ് തട്ടിപ്പ് നടത്തിയതെന്നും അന്വേഷിച്ച് വരികയാണ്. ഇയാളെ ജോലിയില്‍ നിന്ന് സസ്‌പെന്റ് ചെയ്തു. പ്രതിയെ ഇന്ന് കോടതിയില്‍ ഹാജരാക്കും.