കിരീടത്തിനായി സെനഗലും- അള്‍ജീരിയയും ഏറ്റുമുട്ടും, മത്സരം രാത്രി 12:30ന്

കെയ്‌റോ: ആഫ്രിക്കന്‍ നാഷന്‍സ് കിരീടം സ്വന്തമാക്കുന്നതിന് വേണ്ടി സെനഗലും അള്‍ജീരിയയും ഇന്ന് ഏറ്റുമുട്ടും. ഈജിപ്തിന്റെ തലസ്ഥാനമായ കെയ്‌റോയിലെ അന്താരാഷ്ട്ര സ്റ്റേഡിയത്തിലാണ് ഫൈനല്‍ മത്സരം നടക്കുന്നത്. സ്വന്തം നാട്ടില്‍ നടന്ന കപ്പില്‍ ഈജിപ്ത് നേരത്തെ പുറത്തായിരുന്നു.
പ്രീ ക്വാര്‍ട്ടറില്‍ ദക്ഷിണാഫ്രിക്കയോട് പരാജയപ്പെട്ടായിരുന്നു ഈജിപ്ത് പുറത്തായത്. ആദ്യ സെമിയില്‍ എതിരില്ലാത്ത ഒരു ഗോളിന് തുണീഷ്യയെ തകര്‍ത്താണ് സെനഗല്‍ ഫൈനലില്‍ പ്രവേശിച്ചത്. നിശ്ചിത സമയത്ത് ഗോള്‍ രഹിതമായ മത്സരം അധിക സമയത്തേക്ക് നീളുകയായിരുന്നു. 100-ാം മിനുട്ടില്‍ പിറന്ന സെല്‍ഫ് ഗോളിന്റെ ബലത്തിലായിരുന്നു സെനഗല്‍ ഫൈനലില്‍ പ്രവേശിച്ചത്. നിശ്ചിത സമയത്ത് ഇരു ടീമുകള്‍ക്കും ഓരോ പെനാല്‍റ്റി വീതം ലഭിച്ചുവെങ്കിലും ഗോള്‍ കീപ്പര്‍മാര്‍ രക്ഷകരാവുകയായിരുന്നു.
2002 ല്‍ നിര്‍ഭാഗ്യം കൊണ്ട് നഷ്ടമായ കിരീടം തിരിച്ച് പിടിക്കാനുള്ള ഒരുക്കത്തിലാണ് ലിവര്‍പൂള്‍ താരം സാദിയോ മാനെയും സംഘവും. മറ്റൊരു സെമിയില്‍ 2-1 എന്ന സ്‌കോറിന് അള്‍ജീരിയ നൈജീരിയയെ പരാജയപ്പെടുത്തിയാണ് ഫൈനലില്‍ പ്രവേശിച്ചത്. 40-ാം മിനുട്ടില്‍ നൈജീരിയയുടെ സെല്‍ഫ് ഗോളിലായിരുന്നു അള്‍ജീരിയ മുന്നിലെത്തിയത്. 72-ാം മിനുട്ടില്‍ ലഭിച്ച പെനാല്‍റ്റി നൈജീരിയന്‍ താരം ഒഡിയോ ഇംഗാളോ ലക്ഷ്യത്തിലെത്തിച്ച് സമനില പിടിച്ചു. എന്നാല്‍ മത്സരത്തിന്റെ 95-ാം മിനുട്ടില്‍ റിയാദ് മെഹ്‌റസിന്റെ ഗോളിലായിരുന്നു അള്‍ജീരിയ ഫൈനല്‍ ഉറപ്പിച്ചത്. ആഫ്രിക്കന്‍ നാഷന്‍സ് കപ്പില്‍ രണ്ടാം തവണ മാത്രം കളിക്കാനെത്തുന്ന അള്‍ജീരിയ മികച്ച നേട്ടമാണ് സ്വന്തമാക്കിയത്. മാഞ്ചസ്റ്റര്‍ സിറ്റി താരം മെഹ്‌റസും സംഘവും ഇന്ന് കിരീടം നേടുമെന്ന പ്രതീക്ഷയിലാണ്. ഇന്നലെ നടന്ന മൂന്നാം സ്ഥാനക്കാര്‍ക്കുള്ള മത്സരത്തില്‍ നൈജീരിയ ജയം സന്തമാക്കി. എതിരില്ലാത്ത ഒരു ഗോളിന് തുണീഷ്യയെയാണ് അവര്‍ തകര്‍ത്തത്. മത്സരത്തിന്റെ മൂന്നാം മിനുട്ടില്‍ സ്വന്തമാക്കിയ ഗോളിന്റെ ബലത്തിലായിരുന്നു നൈജീരിയ വിജയം സ്വന്തമാക്കിയത്.