കോഴിക്കോട്: ഇന്ധനവില അനുദിനം വര്‍ധിക്കുന്ന സാഹചര്യത്തില്‍ ജില്ലയില്‍ 150 ഓളം സ്വകാര്യ ബസുകള്‍ സര്‍വിസ് നിര്‍ത്താന്‍ തയാറെടുക്കുന്നു. സംസ്ഥാനത്താകെ 3,000 ഓളം സ്വകാര്യബസ് സര്‍വിസാണു ഡീസല്‍ വില വര്‍ധനയെ തുടര്‍ന്ന് സര്‍വിസ് തുടരാന്‍ കഴിയാനാകാതെ സാമ്പത്തിക പ്രതിസന്ധി നേരിടുന്നത്.
കോഴിക്കോട് ജില്ലയില്‍ മാത്രം 150 ഓളം ബസുകളാണ് സര്‍വിസ് നിര്‍ത്തിവയ്ക്കാനൊരുങ്ങുന്നതെന്ന് ബസ് ഓപറേറ്റേഴ്‌സ് അസോസിയേഷന്‍ ജില്ലാ പ്രസിഡന്റ് എ. അബ്ദുല്‍ നാസര്‍ പറഞ്ഞു. ഇക്കാര്യം അധികൃതരെ അറിയിച്ചിട്ടുണ്ട്. സ്റ്റോപ്പേജ് അപേക്ഷ നല്‍കാന്‍ തീരുമാനിച്ചെങ്കിലും ആര്‍.ടി ഓഫിസര്‍മാര്‍ ഇതിന് അനുവദിക്കുന്നില്ല. കാര്യങ്ങള്‍ പരിശോധിക്കാമെന്നാണ് അവര്‍ പറയുന്നതെന്നും അനുകൂല നടപടിയില്ലെങ്കില്‍ തീരുമാനത്തില്‍ നിന്ന് മാറാന്‍ കഴിയില്ലെന്നും അദ്ദേഹം വ്യക്തമാക്കി.
ജില്ലയിലെ മിക്ക റോഡുകളും തകരുകയും ഗതാഗതക്കുരുക്ക് രൂക്ഷമാവുകയും ചെയ്തതോടെ ഒരുദിവസം ശരാശരി 10 ലിറ്റര്‍ ഡീസല്‍ ഒരു ബസിനു സര്‍വിസ് പൂര്‍ത്തിയാക്കാന്‍ അധികമായി വേണ്ടി വരുമ്പോഴാണ് ഡീസല്‍ വില കുത്തനെ ഉയരുന്നത്. ഒരു ദിവസം 75 മുതല്‍ 120 ലിറ്റര്‍ വരെ ഡീസലാണ് ഒരു ബസിസ് ആവശ്യമായുള്ളത്.
മാര്‍ച്ച് ഒന്നിനു ബസ് ചാര്‍ജ് വര്‍ധിപ്പിച്ചതിനു ശേഷം ഒരു ലിറ്റര്‍ ഡീസലിനു 18 രൂപയോളം വര്‍ധന വന്നിട്ടുണ്ട്. നികുതി ഇനത്തില്‍ മാത്രം ഒരുവര്‍ഷം 1,20,000 രൂപയോളം നല്‍കേണ്ടതായി വരുന്നുമുണ്ട്. മൂന്നുമാസം കൂടുമ്പോള്‍ 24,000 മുതല്‍ 34,000 രൂപവരെയാണ് നികുതി അടയ്ക്കുന്നത്. ഇതിനു പുറമേ തൊഴിലാളികളുടെ കൂലിയും ഇന്‍ഷുറന്‍സ് തുകയും വേണം.
ഇപ്പോഴുള്ള പ്രതിസന്ധി മറികടക്കണമെങ്കില്‍ ഡീസലിനു സബ്‌സിഡി അനുവദിക്കണമെന്നാണു ബസുടമകളുടെ ആവശ്യം. ഇപ്പോഴുള്ള നികുതി കുറയ്ക്കുകയും ഉടമകള്‍ക്ക് ക്ഷേമനിധി നടപ്പാക്കുകയും വേണം. കൂടാതെ വിദ്യാര്‍ഥികളില്‍നിന്ന് ബസ് ചാര്‍ജിന് ആനുപാതികമായി 50 ശതമാനം നിരക്ക് ഈടാക്കണമെന്നുമാണ് ഇവരുടെ ആവശ്യം.
ചാര്‍ജ് വര്‍ധന പ്രശ്‌നങ്ങള്‍ക്ക് പരിഹാരമല്ലെന്നാണു ബസ് ഉടമകളുടെ നിലപാട്. ഇനിയും ബസ് ചാര്‍ജ് വര്‍ധിപ്പിച്ചാല്‍ യാത്രക്കാര്‍ കൂടുതല്‍ പേരും ഇരുചക്ര വാഹനങ്ങളെ ആശ്രയിക്കുകയായിരിക്കും ചെയ്യുക. ഇതു വ്യവസായത്തിനു വന്‍ തിരിച്ചടിയായിരിക്കും ഉണ്ടാക്കുക. ഈ സാഹചര്യത്തില്‍ സര്‍ക്കാരിന്റെ ഭാഗത്തുനിന്ന് ഡീസല്‍ സബ്‌സിഡി ഉള്‍പ്പെടെയുള്ള ആശ്വാസ നടപടികളാണ് സ്വകാര്യ ബസ് ഉടമകള്‍ പ്രതീക്ഷിക്കുന്നത്. കാരുണ്യയാത്രയിലൂടെ സ്വകാര്യബസ് ഉടമകള്‍ സ്വരൂപിച്ച തുക ദുരിതാശ്വാസ നിധിയിലേക്ക് കൈമാറാന്‍ അടുത്തദിവസം സ്വകാര്യ ബസ് ഉടമകള്‍ മുഖ്യമന്ത്രിയെ കാണുന്നുണ്ട്. അപ്പോള്‍ ഈ ആവശ്യമായിരിക്കും ഇവര്‍ മുന്നോട്ടുവയ്ക്കുക.