കൊല്ലം: സംസ്ഥാന സര്‍ക്കാരിന്റെ ഒന്നാം വാര്‍ഷികത്തോടനുബന്ധിച്ച് ഫിഷറീസ് വകുപ്പിന്റെ നേതൃത്വത്തില്‍ സംഘടിപ്പിക്കുന്ന മത്സ്യോത്സവത്തിന് ഇന്ന് കൊല്ലം പീരങ്കി മൈതാനിയില്‍ തുടക്കം കുറിക്കും. ഉച്ചയ്ക്ക് 12.30ന് മുഖ്യമന്ത്രി പിണറായി വിജയന്‍ മേള ഉദ്ഘാടനം ചെയ്യും. ഫിഷറീസ് മന്ത്രി ജെ മേഴ്‌സിക്കുട്ടിയമ്മ അധ്യക്ഷത വഹിക്കും. തീരദേശവാസികളുടെ പരാതി പരിഹാരത്തിനായി ഫിഷറീസ് മന്ത്രിയുടെ നേതൃത്വത്തിലുള്ള മത്സ്യ അദാലത്തും ഇന്ന് നടക്കും.
ഉദ്ഘാടനച്ചടങ്ങില്‍ മേയര്‍ വി. രാജേന്ദ്രബാബു ധനസഹായ വിതരണം നിര്‍വഹിക്കും. എം.പിമാരായ എന്‍ കെ പ്രേമചന്ദ്രന്‍, കെ സോമപ്രസാദ്, കൊടിക്കുന്നില്‍ സുരേഷ്, കെ.സി വേണുഗോപാല്‍, എം.എല്‍.എമാരായ എം നൗഷാദ്, മുല്ലക്കര രത്‌നാകരന്‍, കെ.ബി ഗണേഷ് കുമാര്‍, ഐഷാപോറ്റി, ജി.എസ് ജയലാല്‍, കോവൂര്‍ കുഞ്ഞുമോന്‍, എം മുകേഷ്, ആര്‍ രാമചന്ദ്രന്‍, എന്‍ വിജയന്‍പിള്ള, ജില്ലാ പഞ്ചായത്ത് പ്രസിഡന്റ് കെ ജഗദമ്മ, ജില്ലാ കലക്ടര്‍ ഡോ. മിത്ര റ്റി, വിവിധ രാഷ്ട്രീയ സാംസ്‌കാരിക നേതാക്കള്‍ തുടങ്ങിയവര്‍ പങ്കെടുക്കും.
മത്സ്യ അദാലത്തിന്റെ രജിസ്‌ട്രേഷന്‍ ഇന്ന് രാവിലെ എട്ടിന് പീരങ്കി മൈതാനിയില്‍ ആരംഭിക്കും. 29 വരെ നടക്കുന്ന മത്സ്യോത്സവത്തില്‍ തീരമൈത്രി സംഗമം, ഇഗ്രാന്റ്‌സ് ഉദ്ഘാടനം, മത്സ്യകര്‍ഷക സംഗമം, നൂതന മത്സ്യകൃഷിരീതികളെക്കുറിച്ചും മത്സ്യകൃഷി സാധ്യതകളെക്കുറിച്ചുമുള്ള സെമിനാറുകള്‍, മത്സ്യ ഡോക്യുമെന്ററി പ്രദര്‍ശനം, കലാപരിപാടികള്‍ തുടങ്ങിയവ നടക്കും.