തൃശൂർ: തൃശൂർ എക്സൈസ് ഇൻസ്പെക്ടറുടെ ഓഫിസിൽ വിജിലൻസ് റെയ്ഡ്. പരിശോധനയിൽ ഏതാണ്ട് 72,500 രൂപയും വാഹനത്തിൽ നിന്നു 10 കുപ്പി മദ്യവും പിടിച്ചെടുത്തു. വാഹനത്തിൽ നിന്നാണ് 42,500 രൂപയോളം കണ്ടെത്തിയത്. എക്സൈസ് ഓഫീസറുടെ പക്കൽ നിന്ന് 30,000ത്തോളം രൂപ പിടിച്ചെടുത്തു. ഇതിനോടൊപ്പം മൂന്ന് ക്രിസ്മസ് കേക്കുകളും കണ്ടെത്തിയിട്ടുണ്ട്.

ക്രിസ്മസ് തലേന്ന് പണത്തിന്റേയോ, മദ്യത്തിന്റേയോ ഇടപാടുകളുണ്ടോ എന്നറിയാനായിരുന്നു വിജിലൻസ് റെയ്ഡ്. ഓഫീസിൽ പരിശോധന നടത്തുന്നതിന് മുൻപാണ് വാഹനം പരിശോധിച്ചത്. 10 കുപ്പിയോളം വരുന്ന വിദേശ മദ്യം ഈ പരിശോധനയിൽ കണ്ടെത്തി. ബെക്കാഡി, സ്മിർനോഫ്, മോർഫ്യൂസ് തുടങ്ങിയ വില കൂടിയ മദ്യങ്ങളാണ് പിടിച്ചെടുത്തത്.

ഏതെങ്കിലും കേസുമായി ബന്ധപ്പെട്ട് പിടിച്ച മദ്യമല്ല ഇതെന്നാണ് വിവരം. പാരിതോഷികമായി നൽകാൻ സൂക്ഷിച്ചതാണോ ഇവയെന്ന് വിജിലൻസ് അന്വേഷിച്ചു വരുന്നു.

ക്രിസ്മസ്, പുതുവത്സരം പ്രമാണിച്ച് എക്സൈസ് ഉദ്യോ​ഗസ്ഥർക്ക് ഇത്തരത്തിൽ വൻ തോതിലുള്ള പാരിതോഷികങ്ങൾ ലഭിക്കുന്നതായി രഹസ്യ വിവരം ലഭിച്ചതിന്റെ അടിസ്ഥാനത്തിലായിരുന്നു പരിശോധന. ഡിവൈഎസ്പി ഷിബുവിന്റെ നേതൃത്വത്തിലുള്ള വിജിലൻസ് ഉദ്യോ​ഗസ്ഥരാണ് പരിശോധന നടത്തിയത്.

A vigilance raid at an excise office resulted in the seizure of 72,500 rupees in cash, 10 bottles of liquor, and a Christmas cake, highlighting alleged corruption and misconduct.