ടോകിയോ: പ്രീ സീസണ്‍ മത്സരത്തില്‍ ചെല്‍സിക്ക് തോല്‍വി. കഴിഞ്ഞ ദിവസം നടന്ന മത്സരത്തില്‍ ജെ ലീഗ് ക്ലബായ കാവസാക്കി ഫ്രോണ്ടല്‍ ആണ് ചെല്‍സിയെ ഏകപക്ഷീയമായ ഒരു ഗോളിന് പരാജയപ്പെടുത്തിയത്.
സാരിക്ക് പകരക്കാരനായി എത്തിയ ലംപാര്‍ഡിന് കീഴില്‍ ടീമിന്റെ ആദ്യ തോല്‍വിയായിരുന്നു ഇന്നലത്തേത്. പുതിയ പരിശീലകന്‍ ഫ്രാങ്ക് ലാംപാര്‍ഡ് പരിചയ സമ്പന്നരായ താരങ്ങളെ മുന്‍നിര്‍ത്തിയാണ് മത്സരം തുടങ്ങിയതെങ്കിലും ജപ്പാന്‍ ക്ലബിന് മുന്നില്‍ പിടിച്ച് നില്‍ക്കാനായില്ല.
ചെല്‍സിക്ക് വേണ്ടി ആദ്യമായി കളത്തിലിറങ്ങിയ അമേരിക്കന്‍ താരം പുള്‍സിച്ച്, ജിറൂദ്, കെന്നഡി എന്നിവര്‍ക്ക് ഗോളവസരം ലഭിച്ചെങ്കിലും ഗോള്‍ കണ്ടെത്താനായില്ല. മത്സരം അവസാനിക്കാന്‍ മിനുട്ടുകള്‍ മാത്രം ബാക്കി നില്‍ക്കെ ഡാമിയാവോയിലൂടെ കാവസാക്കി ഗോള്‍ നേടി മത്സരത്തില്‍ ജയം ഉറപ്പിക്കുകയായിരുന്നു. പ്രീ സീസണിലെ അടുത്ത മത്സരത്തില്‍ ചെല്‍സി ബാഴ്‌സലോണയെ നേരിടും.